Illuatungiliuttut aningaasanut inatsisissaq nersunngilaat
Naalakkersuisut 2011-mi aningaasanut inatsissatut siunersuutaata qulequtaa - Atugarissaarnerup aningaasalersoneqarnera - siunnersuutip imaanut tulluanngitsutut Atassummiit nalilerneqartoq siunnersuummik uniuisutut, Siumumit oqaatigineqarpoq.
- Inuiaqatigiinni atugarissaarnissaq anguneqassappat, inuiaqatigiit suliffissaqarnissaat pimoorussilluni sulissutigineqartariaqarpoq. Kisianni tamana sulissutigigaat takusinnaanngilara, Siumup siulittaasua Aleqa Hammond naliliiivoq.
Atassutip politikkikkut siulittaasuata tulliata Steen Lyngep qulequtaq aamma tulluarsorinngilaa:
- Qulequtaq kusanaqaaq, kisianni inuiaqatigiinni tamakkiisumik aaqqiinermik imaqanngimmat tulluarsorinngilara.
- Iluarisimaakkatsinnik aallartissagutta, meeqqat ulloq unnuarlu angerlasimaffissaannik arfinilinnik inissaqartunik pilersitsiniarneq uagut assorsuaq tapersersorparput, naak amerlanerusunik inissaqarnissaa kissaatiginaraluartoq.
Kisianni inuit namminneq illuutiminnik iluarsaanissaannut tapiissutaasartut peerneqarnissaannik Naalakkersuisut siunnersuutaat, Steen Lyngep akerleraa.
Isumaqarpoq, inuit nammineq illoqartarnerat nutaajoqisoq, aammalu illut pisortanit pisiarisimasaat aserfallassimasut
- Ikaarsaariarfissamik peqartariaqarpugut, nalunaareerluni immaqa ukiuni tallimani quliniluunniit aaqqissuussinerup atuukkunnaarnissaa nalunaarutigineqaqqaartariaqarpoq.
Aleqa Hammond oqarpoq, suliffissaaleqineq maannakkut naalakkersuisuusut nalaanni amerleriarsimasut, ujartorpaalu, sanaartornermi suliffiit mikisut akunnattumillu angissusillit Namminersorlutik Oqartussanit annerusumik atorneqarnissaat.
- Sanasuaqqat, qalipaasuaqqat ruujorilerisuaqqallu inuiaqatigiinni pigineqartuusut periarfissinneqanngillat inerisaaqataanissaminnut. Nunap inerisarneqarnera innuttaminit soorunami ingerlanneqartussaavoq, taannalu suliarinnittussarsiorsarnerup aaqqissuunneratigut qulakkeerneqartariaqarpoq.
