Illuatungiliuttut ammaanersiornermi oqalugiaat nersualaaraat
Ukiakkut ataatsimiinnerup aallartinnera ileqqoq malillugu naalagiaqatigiinnermik, kalaallisoornermik, naalakkersuisullu siulittaasuata, Múte B. Egedep (IA) oqalugiarneranik aallartinneqarpoq.
Taassuma ammaanermi oqalugiarnermini ilisimasaqarluartut assaallu sulisinnaasut nunatsinni amigaataasut tamannalu utoqqaat illuisa meeqqeriviillu matunerinik kinguneqarsinnaasoq oqaatigaa.
Utoqqarnik paaqqutarinnittussat perorsaasunillu meeqqanik paarsisussat amigaataapput. Tamatuma sanitigut suliffeqarfiit sulisussaaleqipput, nunanilu allaniit tikisitsinikkut amigaataasut matussuserniarneqarput.
- Ersarissumik naqissusigassanngorpoq, inuit peqqillutillu pisinnaasut - tamarmik – sulissammata, naalakkersuisut siulittaasuat oqarpoq.
Taassuma oqalugiarnerata kingunitsianngua illuatungiliuttunit politikerit KNR-imit naapippagut, taakkulu siulittaasup oqaasiinut qisuariaataannik tusarniaaffigalugit.
Taallaq nuannarigaa
Demokraatinit, Anna Wangenheim ima oqarpoq:
- Maluginiarpara pisarnerniit immaqa siornatigut oqalugiaatigisarsimasaaniit allaanerulaarpoq, Anna Wangenheim oqarpoq.
- Inuiaqatigiinni pissutsit oqariartuutit ernumassutit eqqarsaatigissagaanni malunnarput taakkua oqariartuutigigai assersuutigalugu inuiaqatigiinni sulisartuuneq akilersinnaaneq akilersuusinnaasariaqartoq taamaattullu inuit sulisinnaasut tamarmik sulisariaqartut taakku immikkut maluginiarpakka siornatigut isumaqannginnama Múte B. Egede taamatut oqariartuuteqarnera taamak ersaritsiginikuusoq, taanna ilassusiivoq.
Atassutilli siulittaasua, Aqqalu Jerimiassen taama tapersiitiginngilaq.
- Aallartinnera torrassuuvoq taallialerilluni pigami taannartaa torrattutut taasinnaavara taava sinnera oqaatsinik tvistererujoorluni taamatut taaginnaraanni oqaatsini uteqataaginnarlugit torrattumik nassuiaramik taava kisianni annerusumik imannak nutaarsiassanngunngikkaluarlugit oqaatsinik atuillaqqinnermini soorlulimi nutaaliorpalaarluni kisianni isigissagaanni taamaavinngilaq, Aqqalu Jerimiassen oqarpoq.
- Ukulu maannakkut annerusumik eqqartugaata taavalu tassaasut pissakinnerusut ikiorneqarnissaat amigaataavoq inuussutissarsiortummi? Tamakkua amigaatiginartorujussuupput.
Allanngortoqanngitsoq
Demokraatit Atassutillu muminganik Naleqqap oqalugiaammut qanoq isumaqarnera suli ersarinngilaq. Siulittaasuata Pele Brobergip oqaasertaligaa ataasiinnaavoq:
- Ataasinngorpat taanna oqaasertalerneqassaaq Naleqqamiit oqallisigilerutsigu inersuarmi kisianni ukiut pingasut kingulliit nikittoqanngilaq oqariartuutaani, taanna oqarpoq.
