Atlantikup Avannaani Suleqatigiit Folketingimi illuatungiliuttunik suleqateqarnermik unitsitsinissamik sioorasaaruteqarnerat iluaqutaavoq.
Tikaagulliup neqaanik tuniniaasinnaalernissamik Cites-ip ataatsimiinerani Japanip siunnersuutaanut danskit itigartitsinissamik inassuteqartut Europarudvalgimi ikinnerussuteqalersimasut Kuupik Kleist oqarpoq.
- Arfanniarnermut tunngasut ataatsimiititaliani suleqatiginiakkatta saneqqulluta aaliangiiffigisimavaat, ataatsimiitsitaliallu inissitsitertussaammata, uagullu ilanngikkutta illuatungiliuttut ilaasortamik ataatsimik annaasaqartussaammata taamatut tusaqqusaarniarsimavugut, Kuupik Kleist oqarpoq.
Danmarkip EU-mut pulagaluttuinnarnerani ajornartorsiutit taamaattut nunanut allanut politikkeqarnermi tunngasut takkuttarnissaat ilimagalugu taamatut iliuuseqartariaqarsimallutik Kuupik Kleist aamma oqarpoq. Oqaatigaalu apeqqutini taamaattuni inuiaat tusaaniarneqarnerulissasut.
Tamatuma kingorna socialdemokratit siulittaasuat Mogens Lykketoft Lars-Emil Johansen (S) peqatigalugu ilisimatitsipput socialdemokratit isummernerminnik allanngortitsisimasut, taamalu japanimiut siunnersuutaannut itigartitsiniarunnaarlutik. Naalakkersuisut maannna inanneqarput Atlantikup Avannaani Suleqatigiit isumaat tusaaniarneqartassasoq.