Illuatungeriit oqaloqatigeeqqullugit borgmesterimit kaammattorneqarput
Nunaqarfinni pineqartuni najugaqartut ikittuunngitsut suliunnaarnerat, atugaasalu ajorseriarnissaat, minnerunngitsumillu kommunip akileraarutitigut isertitaanut sunniuteqarnissaa, Jess Svanep ernummatigaa.
- Sulisuinnaanngitsut, aammali qanigisaasut, matusinermit eqqorneqassapput. Taamaammat illuatungeriit oqaloqatigiillutik aaqqiissutissamik nassaarniaqqullugit kaammattorusuppakka. Nunaqarfinni tunitsiviit tamarmik matuneqarnissaat Arctic Green Foodip ippassaq kalerriutereeraalu, Qaasuitsup Kommuniani borgmesteri tusagassiuutinut taama nalunaarpoq.
Nunaqarfinnut kiffartuussinissamut isumaqatigiissummik nutaamik isumaqatigiinniartoqanngimmat, sulisut tamarmik ukiortaamiit soraarsinneqarnissaat suliffeqarfissuup sioorasaarutigaa.
Aalisarnermut, Piniarnermut Nunalerinermullu Naalakkersuisup, Ane Hansenip, tamanna upperinngilaa. Taanna Radioaviisimut ippassaq oqarpoq, aappaagu aningaasanut inatsisissaq naammassineqartinnagu kiffartuussinermut nutaamik isumaqatigiissusiortoqarnavianngitsoq, Arctic Greenfoodimut qangali ilisimatitsissutigereerini.
- Nunaqarfinnik sallunaveeqqutitut atorneqarput, Ane Hansen ippassaq oqarpoq.