Illuaqqat aserorteriffigineqartut
Illuaqqat sisamat Sisimiut eqqaanniittut tillinniarfigineqarlutillu aserorteriffigineqarsimapput. Sisimiuni politiit ippassaq nalunaarfigineqarput umiatsiaaqqat pullattakkat marluk Kangerluarsuk tullermi tissukartut siumorneqarmata. Benzinamut dunkit, flamingot, immiaaqqat puukui kamippaallu aamma umiatsiaaqqat eqqaanni nassaarineqarput.
Sisimiuni politiit nalunaarput illuaqqat sisamat aserorteriffigineqarsimasut tillinniat igalaat aserorsinnarlugit isersimallutik.
Politiit paasiniaanerminni innuttaasunit ikiorneqarnissartik pisariaqartippaat.
Umiatsiaaqqat pullattakkat nassaarineqartut tassaapput: qasersoq YAN3305-mik mærkilik qorsummillu nylonimik allunaasartalik. Umiatsiaaqqap aappaa tassaavoq AVANimik mærkilik tassanilu aamma puussiaq Brugsenimeersoq nerisassanik imalik nassaarineqarpoq.
Umiatsiaaqqanik pullattakkanik taakkuninnga piginnittut politiit attavigerusuppaat umiatsiaaqqallu politiit angallataannut Sisak IV-mut Sisimiut umiarsualivianut takuniarneqarsinnaapput. Illuaqqat aserorteriffigineqartut Kangerluarsuk tullermi Majoriap kangianiipput.
Sisimiuni politiit oqarasuaataat tassaavoq 864222.
