Illuaqqani perusuersartarfiit pitsanngorsarniarneqalerput

Atlantikup Avannaani suleqatigiiffik, NORA, 200.000 koruuninik aningaasaleeqqammerpoq, suliniut qulequtserneqarluni " Takornariat illuaraanni Peqqinnissamut atortut".

Sisimiut eqqaanni illuaqqat 27-t misileraanermi atorneqassapput. Illuaqqat taakku piniartunit aalisartunillu atorneqartarput, illuaqqalli qulingiluat kisimik kuuffittaqanngitsunik perusuersartarfeqarput.

Illuaqqani sinneruttuni 18-ini atuisut pinngortitami perusuersartariaqartarput, tamannalu avatangiisinut peqqinnissamullu naapertuutinngilaq. Taamalu qanganisarpalutsigisumi najugaqartariaqartarnertik takornariat aamma naammagittaalliutigisarpaat.

Taamaammat tamaani illuaqqat aalajangersimasut arlallit misiligutaasumik perusuersartarfilersornissaat aappaagu 2011-mi upernaap tungaanut misiligarniarneqalerpoq.

Erngup maangaannartinneqartartup atorluarneqartarsinnaanissaa neriuutigineqarpoq, taamaalilluni imermik innaallagissamillu atuineq pisariaqassanngimmat, takornariat atuisullu allat perusuersaraangamik qimaannagaat taamaalillutik peqqinnarnerusumik salinneqartalerniassammata.

Illoqarfinni mikinerusuni nunaqarfinnilu misilittakkat atorluarneqartalersinnaanissaat aamma neriuutigineqarpoq, tamakkunanimi perusuersartarfiit kuuffittaqanngitsut amerlanerni aamma atorneqarmata.