Illu Uummannami meeqqat angerlarsimaffiata eqqaaniittoq ikuallattoq
Naalli ikuallangaatsiaraluartoq qujanartumik ajoqusertoqarsimanngilaq meeqqallu ajunngitsut Uummannami
meeqqat angerlarsimaffianni pisortaq Ann Andreassen oqarpoq.
- Meeqqat ajunngillat. Ikuallattoqarnerani inersimasunit paarilluarneqaramik isumagineqarluarlutillu ajunngillat, Uummannami meeqqat angerlarsimaffianni pisortaq, Ann Andreassen taama oqarpoq.
Najugaqartoq annaanneqartoq
Uummannami politiit sapaammi ullaakkut qulingiluap qeqqanut ikuallattoqarneranik kalerrinneqarput.
- Taamaariarmallu qatserisartut politiillu tappikunga ornigussimapput. Taavalu tassani ineqartuusoq ataaseq ajunngitsoq napparsimavimmut ingerlateqqillugu. Taamaaleriarluni qatserineq aallartissimavoq, Ilulissani politikommissæriugallartoq Palu Petersen oqarpoq.
Illu ikuallattoq meeqqat angerlarsimaffiata saninnguaniissimavoq meeqqallu isumagilluarneqartut Ann Andreassen oqarpoq.
- Toqqissisimavugut. Taamaalilluta aamma meerartagut isumagilluarsinnaavagut. Qatserisartummi politiillu sulilluarnerat isigisinnaavarput. Taakkualu pisinnaasartik tamaat atorlugu ikuallanneq qamisarpaat. Ann Andreassen oqarpoq.
Illoqarfik imeeruttoq
Ikuallannerli aatsaat ataasinngornerup unnuaani ataatsip missaani qaminneqarsimavoq.
- Ataatsip missaani qaminnasorigaluarparput. Kingusinnerusukkulli ikummaqqippoq. Taamaammat ippassaq ulloq pikkunarlunilu takivoq,
Uummannami meeqqat angerlarsimaffianni pisortaq taama oqarpoq
Qamisaanermimi ilaatigut illoqarfik imeerutitsiarsimasoq, Palu Petersen oqarpoq
- Ilaatigut imeerunnerup kinguneranik, illoqarfiup imeerunnerata kinguneranik, aammalu illup nutaannginnera peqqutigalugu illup ikerani qamisaaniarneq ajornakusoortinneqarsimavoq. Taamaattumillu arlaleriarluni illu ikummaqqittarsimalluni.
Ilulissani politikommissæriugallartoq Palu Petersen Kathrine Krusemit apersorneqarluni taama oqarpoq Jaaku Lyberthilu atuaasuuvoq.
Ikuallannermut suna aallarniutaasimanersoq politiit suli misissorpaat.