Illu toqqissisimaartarfik Canadami atorluarneqartoq

Imigassaq ikiaroornartorlu peqqutaallutik Canadami nunaqarfeeqqani illoqarfinnilu juullikkuni nakuusertoqartarpoq eqqissiviilliortoqartarlunilu, Inuvimmilu innuttaasut namminneq iliuuseqarsimapput, tamaanimi illu toqqissisimaartarfiullunilu eqqissisimaartarfik, tassa ikiaroorfiunngilluinnartoq aalakoorfiunngilluinnartorlu pilersinneqarmat.

Illu angerlarsimaffeqanngitsut oqquiffigisinnaavaat, meeqqallu toqqissisimaniarunik isersimaarfigisinnaallugu.

Illu isersimaartarfik juullimi nerersuaartitsisimavoq, ilaqutariillu imigassartaqanngitsumik nuannisaarsinnaanerat ilikkartikkumallugu isersimaartarfik assigiinngitsunik aaqqissuussisimavoq.

Unnukkaangat filmertoqartarpoq pinnguaatinilluunniit pinnguartoqartarluni, saniatigut pizzanik allanillu sassaalliisoqartarpoq, tamannalu meeqqanit nuannarineqaqaaq.

Tassa sammisassat ilaqutariit tamarmik sammisinnaasaat periarfissaasimavoq.

Ukiutoqqami allatuulli nuannattoqassaaq, imigassartaqanngilluinnassallunili, taamaasillutik meeqqat inersimasulluunniit paggittoqarnissaa sakkortuuliortoqarnissaaluunniit ernumassutigisariaqarnagu.

Isersimaartarfiit taamaattut Canadami USA-milu nassaassaapput, tassa ilaqutaariit eqqissillutik imigassartaqanngitsumillu nalliuttorsiorfigisinnaasaanik periarfissaqartinneqarlutik.

Inuvimmi isersimaartarfik nalunaaquttap akunnerini 24-ani ammasarpoq, ornigarneqarluartaqaaq assorsuarlu iluatsilluarsimalluni.