Illu sipaarnartoq siulleq naammassivoq

Allattoq Mads Lynge
februaarip 22-at 2005 15:21

Illu sipaarnartoq, qallunaatoorlugu lavenergihus, siulleq sananeqarluni naammassineqaqqammerpoq. Illu Sisimiuniittoq illunut allanut naleqqiullugu marloriaatimik oqorsarneqarsimavoq, kiassarnermullu akiliutigineqartartut affaannanngortinneqarsinnaapput.

- Sanaartornermut atortussat nalinginnaat atorneqarnikuupput, kisiannili illup uumap allaassutigaa marloriaammik oqorsagaasimagami, illumik sanalinnginnerani aqutsisuusimasoq Jørn Hansen Rambøll-imeersoq oqarpoq.

Marloriaammik oqorsarneqarnerata saniatigut illu seqernup qinngorneranik kiassarneqarsinnaassaaq, seqernup nukinga atorsinnaanngorlugu illup qaliani atortussanik ikkussuisoqarsimammat.

Danmarks Tekniske Universitetip nunatsinni suliffeqarfiit peqatigalugit illu sanatippaa. Illu marloqiusanngorlugu sanaajuvoq, affarleriinngorlugu sanaajulluni. Inissiaq ataaseq attartortinneqarniarpoq, inissiap aappaa inisimasoqassanngilaq, uuttortaatinilli

ikkussuiffigineqassalluni.

Uuttortaatit illup ilua qanoq kiatsiginersoq qanorlu isugutatsiginersoq nalunaarsussavaat.

- Pissangatigeqaara uuttortaatinik nalunaarsukkavut qanoq ikkumaarnersut, Jørn Hansen oqarpoq.

Illup sananeqarnera 5 mio.kr-nik akeqarsimavoq, aningaasallu taakkuaVillum Kann Fondenimiit tunissutaapput.