Illu Paarsivik pisortanit tapersersorneqarusuppoq

decembarip 23-at 2005 10:35

Meeqqanut ajornartorsiuteqartunut ulloq unnuarlu inissiisarfik Illu Paarsivik Qaqortumi namminersortuusoq, Nuummiittumi Matutulli ingerlanneqarpoq. Illu Paarsivik Ukiup affaata matuma siornali ammarmat inissat arfineq-pingasuusut inoqartuaannarsimapput. Taamaakkaluartorli misigisimapput Namminersornerullutik Oqartussat oqimaaqatigiinngitsumik pissusilersorfigigaatsik.

Illu Paarsiviup pisortaa Tommy Hansen ima oqarpoq.

Kommunit atuisugut tapiissutitaqanngitsumik 100 procent-imik akiliuteqartarput, illuatungaatigullu aamma ulloq unnuarlu paaqqinittarfinnut Namminersornerullutik Oqartussat pigisaannut taamallaat 50 procentimik kommunit akiliuteqartarlutik. tapiiffigineqartarnertik pissutigalugu. Aamma aningaasartuutinut akiliunneqartarput Danmarkimiit tapiissutit bloktilskud –it aqqutigalugit.

- Kommunit meeqqanik uagutsinnut inisseerusuttut akiliuteqarnerusariaqarnerat naapertuilluannginneruvoq, Illu Paarisiviup pisortaa Tommy Hansen oqarpoq.

Apeqqutigaarput taama isumaqarnertik Namminersornerullutik Oqartussanut apuussimaneraat, akivoq taamaaliorsimallutik kisianni akineqaannarsimallutik allatut ajornartoq, ulloq unnuarlu inissiisarfitsik namminersortuunera pissutigalugu.

Taamatut isumaqarneq silaqarluassaanngitsuliornertut oqaatigisariaqarlugu, Tommy Hansen oqarpoq, tassami aallartikkamillui ukiup affaa matuma siorna, meeqqanut inissatik arfineq pingasuusut inoqartuaannarsimammata, tassuunatigullu takuneqarsinnaareersoq qanoq atorfissaqartinneqartigalutik.

Ilaqutariinnermut Naalakkersuisoq Aleqa Hammond tamanna pillugu ullumikkut oqaaserumanngilaq, juullip kinguninngua decemerip 27 –ani Illu Paarsivimmi ingerlatsisut naapinniarlugit aaliangersimagami.