Illu nukimmik atuinikitsoq suerfissanittoorsimavoq

Natarterneqarpoq 11:36

Illup nukissamik atuinikitsup pilersinneranut ilaatigut siunertarineqarpoq, nutaaliamik nukissamik affaannarmik atuiffiusumik issittumi illuliortoqarsinnaanerata takutinnissaa aamma kalaallit sanaartoriaasitoqaanik isumassarsisitsinissaq, ussissaanerunikkut, kissamik atueqqinnikkut seqernullu kissaanik atuinikkut.

Ukiunik tallimanngortorsiornermut atatillugu oqaatigineqarpoq, sanasut sannarliornerisigut illu ussissusissamisut ussitsiginngitsoq.

- Illup kiassarneranut pilersaarutigineqartumit nukissamik marloriaammik atuisoqarneruvoq, ilisimatooq Carsten Rode DTU-meersoq atuagassiamut Ingeniørimut taama oqarpoq.

- Tamatumunnga pissutaavoq sanasut illoqarfimmeersut silaannarissarfiit igalaallu allallu illup sanaartornerani katiguffiit suerfeqalinnginnissaat eqqummaariffigisimanngimmassuk, Carsten Rode oqarpoq.

Taamaattorli taassuma erseqqissaatigaa, taamaakkaluartoq illu ilaqutariinnut illumit nalinginnaasumit, nukissamik atuinikinneralaarsuummat.

- Tamatumannga ilikkagaqartorujussuuvugut. Ilaatigut paasivarput illu ussilluinnaqqissaartariaqartoq aamma pitsaasumik silaannarissarfeqarnerup qanoq pingaaruteqartiginera. Kalaallit Nunaanni silaannarissarfeqarnissaq pingaaruteqaqaaq, angerlarsimaffiit ilarpassuini iggavimmi aalamut milluaasoqanngimmat ilarpassuisalu silaannarissarfiit kiak aniannginniassammat milissortarmatigik. Tamatumalu peqatigisaanik igatilluni igaat qalaanneqakkajuttarput, tamakkulu tamarmik angerlarsimaffippassuarni isugutammik ajornartorsiuteqalernermik kinguneqartarput, Carsten Rode oqarpoq.

Illumi nukissamik atuinikitsumi misilittakkat atorlugit Sisimiuni nutaamik kollegialiortoqarpoq. Tassanilu nukissamik atuinerup sisamararterutaa, seqernup nukinganit pissarsiarineqartassaaq.