Illu malinnit anguneqartoq: Peroriartorfigisap sequminnera videoni takusaqattaarlugu sakkortuvoq

Nina Jul Larsenip angajoqqaavi nukaalu Ilulissani illuminnit tallimanngornermi ullaap tungaani qimagassortinneqarput. Illuimi malinnit anguneqarput

Ilulissani illoqarfiup immikkoortortaqarfiisa ilaanni Pitoqqermi illut pingasut inuttaat politiinit tallimanngornermi ullaap tungaani qimagussortinneqarput.

Tamanna pivoq ulussaarsuartut sakkortutigisumik anoraasuartarnerata nalaani illut Pitoqqermi immap killinganniittut malinnit anguneqartalernerini illut ilaat ilanngartiterneqalermat.

AAMMA ATUARUK Ilulissani illunit pingasunit qimagussuisoqarpoq: Innuttaasut immap eqqaaniissanngitsut

Nina Jul Larsenip nukaa sisamanik qaammatilimmik meeralik illumi sungaartumi najugaqarpoq, angajoqqaavilu saniani aappaluttumi najugaqarlutik.

Illu sungaartoq meeraallutik peroriartorfigaat - taannaavorlu malinnit anguneqarluni ilanngarneqartoq.

Illut malinnit anguneqarnerani assilisat videoliallu nittartakkatigut sukkasuumik siaruarterneqarput.

- Illu peroriartorfigisimasaq ussatigineqartorujussuanngorluni nittartakkatigut takusassiarineqaqattaarnera sakkortuvoq, Nina Jul Larsen, illuni pingasuni najugaqartuni qimagassortinneqartut ilaasa paniat qatanngutaallu, oqarpoq.

- Tamarmik ajunngimmata nuannaarutigaarput. Kisianni inuit assinik siammerterinerat takullugu assut sakkortuvoq. Aliikkusersuisoqanngilarmi. Taamaammat inuit eqqarsaqqilaartarnissaat kissaatiginarpoq, Nina Jul Larsen oqarpoq.

Politiit naapertorlugit illuni taakkunani pingasuni najugaqartut ajoqusinngillat. Taamaattorli politiit inuit tallimanngornermi ullaap tungaani mallerpallaarnera pissutigalugu sissamiinnginnissaat innersuussutigivaat.

Tamatumalu saniatigut aamma Oqaatsuni, Qeqertami, Saqqami Ilimanamilu aamma sissamiittoqannginnissaa innersuussutigineqarpoq.

Illut arlallit ajoqusersimapput

Kalaallit Nunaanni Politiit Ilulissani anorersuarnerani malissuarneranilu illut arlallit ajoqusersimasut tallimanngornermi ualikkut nalunaarutigaat.

- Illut sisamat eqqorneqarput, soorlu aamma anartarfilerivik malinnit sikunillu aseruatiterneqarsimasoq. Tamatumalu saniatigut aamma Nukissiorfiit pumperiviat ajoquserneqarsimavoq, politiit tusagassiuutinut taama allapput.

Taakkua saniatigut imaanut kuuffiit amerlassusaat taaneqanngitsut ajoqusersimapput.

Ilulissani tallimanngornermi ualikkut qatsoriartorpoq, soorlu aamma imaq appariartoqqilersoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat