Illorsuarni illut ullumi misissorneqassapput
Issittumi Sakkutooqarfik, Qaasuitsullu Kommuniani upalungaarsimasut pigisat aaneqarnissaannut suleqatigiipput, suliarlu marlunngornermi ullaakkut aallartippoq, marlunngormallu unnuakkut unnuap-qeqqata missaani naammassineqarluni.
Jette Elkjærip, Issittumi Sakkutooqarfiup tusagassiisartuata oqaatigaa Nuugaatsiami illut 24-t misissorneqarsimasut.
Isumannaallisaaniarnerlu pissutaalluni suliaq sivisungaatsiarsimasoq, Jette Elkjærip Sermitsiaq.AG-mut oqaatigaa.
Pigisat aaneqartut Uummannaliaanneqarput, Nuugaatsiamit qimagutitinneqarsimasut ilaannut tassani utertinneqarlutik. Pisattaminnik inissaqartitsinngikkallartut pisataat containerinut inissikkallarneqarsimapput.
Illorsuarni illut suleqatigiinnit ullumi sisamanngornermi misissorneqassapput. Jette Elkjærip ilimagaa suliaq uani sukkanerulaassasoq, illummi tamaani ikinnerupput, nakkaattoornissaannullu aarlerinaateqannginnerullutik.
