Illorsuaq arsarnernik takutitsivissaq isumaqatigiissutigineqartoq
(Danmarks Tekniske Universitet pineqartoq ulloq 25. oktober 2018 nal. 08:18 iluarsissutigineqarpoq, aaqq.)
Illorsuaq arsarnerit pillugit ilisimatusarfiutigaluni takutitsiviusussaq Ilulissani qulimiguulinnut mittarfiusimasup eqqaani, Kangia pillugu illorsuassap toqqavissaata ungasinngisaani, aamma pilersinneqarnissaa ilimanarsilluinnarpoq.
Avannaata Kommunianimi borgmesteri, Palle Jerimiassen Siumumeersoq, aamma Danmarks Tekniske Universitet Ilulissani illorsuarmik arsarnerit pillugit ilisimatusarfiutigaluni takutitsivissamik pilersitsisoqarnissaanut isumaqatigiissuteqaqqammerput.
Illorsuarmi, arsarnerit pillugit paasissutissiisarfiutigaluni misigisassarsiorfiusinnaasumi, inuit 140-t ataatsikkut isersimasinnaassapput.
- Ilisimatusarnikkut arsarnernut tunngatillugu ilisimatusarfittut atorneqassooq. Taavalu aamma saniatigut takusaasoqarsinnaalluni iserluni arsarnerit qanoq ittuuunerinik, qanoq pinngortarnerinik, aamma immikkuullarissumik arsarnerit qanoq nipeqarnersut tassani tusaaneqarsinnaassapput, Palle Jerimiassen oqaluttuarpoq.
Kikkut tamarmik ornissinnaasaat
Palle Jerimiassen naapertorlugu illorsuaq kikkunnit tamanit iserfigineqarsinnaassaaq, soorlu ilisimatusartunit, takornarianit aamma allanit arsarnerit pillugit soqutiginnittunit.
Aningaasaateqarfiit aningaasaliinerisigut illorsuaq, arsarnerit pillugit ilisimatusarfiutigaluni takutitsiviusussaq, sananiarneqartoq, Avannaata Kommunia nunagissaanermut aningaasaliissuteqassaaq.
- Paasitinneqarpugut aningaasaateqarfiit, fondit, arfineq-marluk oqaloqatigineqareersimasut. Taakkualu soqutigigaat peqataanissartik. Kisianni inissivinneqarnikuunngilaq fondit sorliit ilaaniarnersut, Palle Jeremiassen oqarpoq.
Danmarks Tekniske Universitetip aamma Avannaata Kommuniata illorsualiassaq pillugu inaarutaasumik atsioqatigiillutik novembarip qulingata missaani isumaqatigiissuteqassapput.
Illorsuaq, arsarnerit pillugit ilisimatusarfiutigaluni takutitsiviusartussaq, pillugu tallimanngornermi Qanoruumi ilanngutassiarineqartoq uani takusinnaavat imaluunniit takoqqissinnaavat.
