Illoqqortoormiut suliniarfigineqaqqilerpoq
Inuuneq peqqinnerusoq qulequtsiullugu, Paarisa nuna tamakkerlugu maanna sulinialerpoq, suliniullu Illoqqortoormiuni aallartinneqareerlluni. Illoqqortoormiut taamatut aappassaannik suliniarfigineqartussanngorput. Massakkut nutaamik suliniartoqarnissaa, Atassut sinnerlugu Illoqqortoormiut borgmesteriata Erling Madsenip ima tunngaveqartippaa:
- Illoqqortoormiuni meeqqanik sumiginnaaneq imigassamillu ajornartorsiuteqarneq annersaasarnerillu aasaq naangajallugu eqqartorneqarput. Taava Paarisa-minngaanniit ippassaani tikeraarneqarpugut, tassungalu atatillugu innuttaasut ataatsimiitinneqarput, ataatsimiititsinermi qulequtaritinneqarluni inuunerissaarnissaq peqqissuunissarlu.
Suliniarnermi nutaami Namminersornerullutik Oqartussat Illoqqortoormiullu kommunea suleqatigiillutik Illoqqortoormiuni pinaveersaartitsisussamik septembarip aallaqqaataani atorfinitsitsipput.
- Pinaveersaartitsisussap innuttaasut imigassamik allanillu ajornartorsiutillit qanimut tikillugit oqaloqatigisassavai. Paarisaminngaanniit aamma oqariartuutigineqarpoq kalaallit aalanngippallaartugut, taannalu aallaavigalugu innuttaasunut nutaanik susassaqartitsinissaq pinaveersaartitsisup aamma suliarissavaa.
Illoqqortoormiut siornagut aamma suliniarfigineqarsimapput. Suliniarsimanerlu kinguneqarpallaarsimanngitsoq Erling Madsen isumaqarpoq:
- Iluatsippaallangilaq, kisianni soorunami aamma ajunngitsunik pissarsiffiginikooqaarput.
2000-ip aallartinnerani taama suliniarneq aallartimmat
Illoqqortoormiormiut qulequttat 19-it tikillugit kissaateqarsimasimapput.
- Taamanikkut kissaatinut ilaapput ineqarnikkut ajornartorsiutit suliniuteqarfigineqarnissaat kiisalu Illoqqortoormiut avataanut angallassinerup akisunerujussuanut oqilisaanneqarnissaq, kissaatilli tamakku kinguneqarsimallat, nassuerutigissavaralu inissaqarniarnerup suliffissaaleqinerullu annertunerusumik suliniuteqarfiginiarnera pissarsiffiginngijavissimagatsigu, Erling Madsen oqarpoq.
Tunumi meeqqat sumiginnagaasut pillugit Danmmarkimi tusagassiuutitigut qanittukkut saqqummertoqarnera Illoqqortoormiuni suliniummik maanna aallartitsinermut aamma tunngavioqataasoq, Erling Madsen oqarpoq. Illoqqortoormiuni pinaveersaartitsisussaq septembarip aallaqqaataaniit atorfinitsinneqarpoq.
