Illoqqortoormiut kujataanni qilalukkat pisat sinikkui amerlasuut

Qilalukkat pisarineqartut Illoqqortoormiut kujataanni Qalaatsivimmi Illoqqortoormiunit 107 kilometerinik kujatsitigisumi pisarineqariarlutik pilanneqarput.

Piniartut umiatsiat angallatigalugit Qalaatsivimmut qilalugarniarput, sapaatillu akunnerata naanerani qilalukkat 32-t pisarineqarlutik.

Qalaatsivimmi qilalukkat 48-t sinnikuinik takornariat takunnissimanerat Illoqqortoormiuni piniartut ilaannit uppernarsarneqarpoq.

Qilalukkat tuugaavi peerneqarsimapput, taamatullu neqaasa mattaasalu ilaannaat peeriarlugit sinneri qimaannaarneqarsimapput, Sermitsiap nittartagaani taamatut allaaserineqarpoq.

Qilalukkat pisarineqarnerisa kingorna Illoqqortoormiuni sila ajortippoq, pisallu sinneri aaneqarsinnaasimanatik, piniartut ilaat radioaviisimut oqaluttuarpoq.

Qilalukkat mattai neqaalu tunisassiorfimmut Arctic Green Foodimut tunineqartarput, maannakkulli tunisineq unitsinneqarallarpoq, tunisat umiarsuarmit aggustip ulluisa 31-anni kitaanut assartorneqareerpata aatsaat tunisisoqaqqissinnaammat.