Illoqqortoormiuni toqunartoqarsoraat

Avatangiisit mingutsinneqarnerisa kingunerisaanik Illoqqortoormiuni inuit eqqugaasimasut oqaatigineqarpoq. Ilisimatuut 2001-imi misissuipput, avatangiisillu mingutsinneqarnerisa kingunerisaanik ilisimatuut maanna ernummatigilerpaat Illoqqortoormiuni innuttaasut aammikkut toqunartoqalersimassasoralugit.

2001-imiilli Århusip ilisimatusarfiata Illoqqortoormiuni innuttaasut akeqanngitsumik aaversinnissaannik neqeroorfigai, neqeroorulli atorneqanngisaannartoq oqaatigineqarpoq.

- Tunumi una immikkuullarissutaavoq, tunumi uumasut kitaani uumasunit naleqqiullugit toqunartoqarneruneri biologinit paasineqarsimammat. Aappaattullu taasariaqarpoq, Illoqqortoormiuni nannunniartoqartarpoq nanortortoqatarlunilu, nanorlu taannaavoq uumasoqatiminik allanik sunilluunniit nerisuusoq, taamaattumik illoqqortoormiuni innuttaasut annerpaamik eqqugaasuupput, taama oqarpoq, ilisimatooq Jens C. Hansen.

Taanna aperineqarpoq, tamanna qanoq kinguneqarsinnaanersoq.

- Una ernumassutissaavoq, inuit hormo-niisa oqimaaqatigiinniartussaanerigaluat sunninneqarsinnaammat, iluameqqissaarli qanorpiaq ajoqutaasinnaanera ilisimanngilarput taamaammallu assut pinartutut tamanna isigaarput. Taamaammanuna Illoqqortoormiuni innuttaasunik aaviiniaraluartugut, taama DR-p radio-anut oqarpoq, Ilisimatooq Jens C. Hansen.

Peqqissutsimut naalakkersuisup Asii Chemnitz Narup DR-ip radio-anut neriorsuivoq nunatsinni taama pisoqartillugu aaviisoqartarnissaa pisalissasoq.