Illoqqortoormiuni suliffissaaleqisut nunatsinni amerlanerpaapput

apriilip 26-at 2006 09:32

Kalaallit Nunaanni Naatsorsueqqissaartarfiup misissuinerata kingulliup takutippaa, Illoqqortoormiuni suliffissaaleqisut nunatsinni amerlanersaasut, ukiunilu tallimaannarni pingasoriaatinngorsimasut.

Illoqqortoormiuni 2005-imi inuit 60-it suliffeqanngillat, tassa sulisinnaasut 15 procentii suliffeqaratik.

2001-imi inuit 23-t suliffeqanngillat, ukiullu tallimaannaat ingerlaneranni kisitsisit pingasoriaatinngorsimapput. Illoqqortoormiuni borgmesterip Erling Madsen-ip nassuiarpaa sooq suliffeqanngitsut taama amerlisimatiginersut qanorlu tamanna qaangerniarneqarsinnaasoq.

-Ilumoorpoq Illoqqortoormiuni suliffissaaleqineq annertungaatsiarmat. Peqqutit ilagivaat Pilersuisoq ukiuni pingasuni-sisamani sulisunik ikilisaasimammat. Nalunngisakka malillugit ukiut pingasut matuma siorna 45-nik sulisoqarsimagaluarpoq, massakkullu 20-t 25-llu akornanniipput. Aamma taanngitsoorusunngisara ukiuni kingullerni piniartut, pingaartumik aappaqanngitsut kisimiittut, piniarnerinnaq kisiat inuussutigisinnaanagu suliffissarsiortunut ilanngussimammata, Erling Madsen oqarpoq.

Suliffissaaleqineq qaangerniarlugu borgmesterip qaammatini kingullerni Arctic Green Food-ip qullersaqarfia allakkatigut oqarasuaatikkullu saaffigisarsimavaa Illoqqortoormiunut alakkaaqqullugit, tunitsivik arlaatigut iliorfigeriarlugu tunitsivittut aallarteqqissinnaanissaa anguniarlugu. Borgmesterip aporfiginerarpaa kommuniminngaanniit aallarnersinnaasaminnik suliffiuteqannginnamik

-Soorunami iliuuseqarniarsarisarpugut. Tassani Namminersornerullutik Oqartussat aallarnisaanermik tapeeqataanissaat assut maanngaanniit ujartorpagut.

Qujanartumik ukiuni kingullerni arfinilinni – arfineq pingasuni takornariaqarneq maani aalajaatsumik ingerlarusaarsimavoq, pitsanngoriartorusaarluni. Ukiut tamaasa takornariat maangartartutut amerliartorusaarsimapput, aamma taanna siunissamut qularnanngilaq inuutissarsiutitut aallunneqarluassasoq, Erling Madsen oqarpoq.

Borgmester-ip ilanngullugu oqaatigaa piniartut qulit missaanniittut takornarianik massakkut qimussiussisartuusut, tamannalu piniartunut tapertaalluartuusoq. Tamanna qaammatini kingullerni ingerlareersimavoq qaammatillu tullii aamma suli ingerlanneqassasoq, Erling Madsen oqarpoq.