Illoqqortoormiuni qinersivik Kalaallit Nunaanni siullersaalluni matuvoq
Illoqqortoormiuni qinersivik kitaata nalunaaqqutaa malillugu arfinernut matuvoq. Qinersivillu Illoqqortoormiuni nalunaaqqutaq arfineq pingasunut matuneqarmat qinersisinnaasut 321-iusut 72,9 procentii qinersiartorsimapput.
Allattoq Oline I. Olsen
juunip 02-at 2009 16:39
Inatsisartunut 2005-mi qinersisoqarmat qinersisinnaasut 79,8 procentii qinersiartorput. Atassut sinnerlugu inatsisartunut 2005- imi qineqqusaartoq Erling Madsen 105-inik taaneqarluni Illoqqortoormiuni qinerneqarnerpaavoq, taanna qineqqusaanngilaq.
Hans Enoksen inatsisartunut 2005-imi qinersisoqarmat Illoqortoormiuni 23-nit qinerneqarpoq, taamaasilluni taaguunneqarnerpaamut tulliulluni. Doris Jakobsen taaguunneqarnerpaat pingajuuvoq, 18-init qinerneqarami, Kuupik Kleist Inuit Ataqatigiinneersoq 15-init qinerneqarpoq, Per Berthelsen Demokraatit sinnerlugit qineqqusaarnermini 14-init Illoqqortoormiormiunit taaneqarpoq.
Illoqqortoormiuni qinersinerup inernerni unnugu arfineq pingasunut piareerneqarnissaat ilimagineqarpoq.
