Illoqqortoormiuni qangatut issittaqqilerpoq

Silaannaq Tunumi Illoqqortoormiuni kiatsikkiartorunnaarluni qangatut issittaleqqinnera maluginiarneqarpoq. Allaat sikuusaleqqittoq 66-inik ukiulik, Jørgen Sanimuinnaq, oqaluttuarpoq:

- Tassa issinnerpaagaangami juullip qaammataani novembarikkunilu taamani eqqaamalluarpara 2001-imi 2002-mi ukiut taakku ingerlaneranni 16-iinnarnik issilertarami . Assorujussuaq silaannaq aamma massakkut allanngoqqippoq, kingumut nillertikkiartornera malunnaqaaq. Uagut Ittoqqortoormiuulluta malugivarput tamanna.

2006-ip ukiaani ukiassakkut qangatut Illoqqortoormiuni meeraanerma nalaanisut issippoq. Taamanimi pissusissamisoorluni ajunngitsumik sikuvoq. Tassa silaannaap nillertikkiartoqqilernera malunnarpoq.

Jørgen Sanimuinnaq-p kisimi silap allanngoriartornera maluginngilaa, aamma qimussiussisartup Martin Munckip tamanna maluginiarpaa.

-1999-imiit ukiut marlussuit matuma siornagut tikillugu kikkut tamarmik silaannaap kissatsinnera malugaat. Maannali pissutsit allanngoqqipput. Biologit oqalukkaluarput tunumi sila suli kissakkiartortoq, kisianni uagut sikuusaleqqinnera, pingaartumik kangerlummi, malugeqaarput. Allaat aasaq tikillugu sikuusalerpoq, sila issilluni apisarneralu qangatut illuni. Aap, silaannaq allanngoraluarpoq, kisianni soorluuna Illoqqortoormiuni sila qangatut ileqqilissoq, tassami ukiut marluk-pingasut matuma siornagutut allanngorartigiunnaarpoq, Martin Munck unnersiorpoq.