Illoqqortoormiuni pisiniarfik imaarutilerpoq

Pisisartulli utaqqeqqeqqaartariaqarput. Umiarsuaq aggustip arfineq pingajuani tikippat aatsaat nutaanik pisiassaqalissaaq.
Nioqqutissanillu amigaateqarluni kipiluttunartorsiortut ilagaat inatsisartuni ilaasortaq Julianne Henningsen.

- Ajoraluartumik ullumikkut oqarsinnaavunga Illoqqortoormiuni iffiarsisinnaanngilatit, qaqortuliarsisinnaanngilatit, qajuusarsisinnaanngilatit taamaatullu aamma qallersuutissat igaassallut killeqartorujussuarmik pisiarineqarsinnaapput. Taamaattumik kipiluttunarpoq, innuttaasut soorunalimi naammagittaalliorput, Julianne Henninngsen oqarpoq.

Ukiup imaalinerani nioqqutissat Illoqqortoormiuni amigaatigineqalertarnerat takornartaanngitsoq Illoqqqortoormiuni Pilersuisumi niuertoq Poul Biilmann oqarpoq. Tassami sapaatip akunnerata uuma tulliani aatsaat umiarsuaqaqqittussaasoq Poul Biilmann oqarpoq.

Aamma takornariat Islandimiit Illoqqortoormiunukartut salliutinneqartarmata nioqqutissat ingerlanneqartussaagaluit sapaatit akunneri kingulliit pingasut ingerlanneqarsinnaassimanngilllat.

- Timmisartumut ilaasussat salliutinneqartarmata nioqqutissat atorfissaqartinneqartut Island-imi uninngatiinnarneqarsimapput. Illoqqortoormiut inuttoorsuunngimmata nioqqutissat arlaannik pissuteqartumik nungoriataartarput, Poul Biilmannn oqarpoq.

Tassa assersuutigalugu takornariat 200-ut missaat tikikkaangata iffiat assigisaallu nungupallassinnaassarput.

KNI-p qullersaqarfianiit ajornartorsiut aamma eqqumaffigaat, allaallu timmisartumik attartornissaq isumaliutigineqarsimagaluarluni.

- Maannakkut nioqqutissat timmisartukkut tikisittakkat nalinnginnasumik akit eqqarsaatigissagaanni akisoreeqisut, timmisartumik attartussagutta suli akitsoqqissinnaanerat ernumanarpoq. Taamatut pisoqartillugu nalilersuiuartarpugut suna akilersinnaanersoq sunalu akilersinnaannginnersoq, Pilersuisumi pisortaq Frederik Olsen KNR-mut oqarpoq.  

Augustusip arfineq pingajuata tungaanut nioqqutissat Illoqqortoormiuni amigaatigineqarallassasut naatsorsuutigineqarpoq.