Illoqqortoormiuni piniartut tunitsivissaaleqipput, amernut tunitsivik Arctic Green Food-illu tunitsivia matoqqammata. Tunitsivissaaleqineq Aalisarnermut Piniarnermullu Naalakkersuisup Finn Karlsenip ima oqaaseqarfigaa:
- Ammeriviup piaarnerpaamik aaqqissallugu neriorsuutiginikuuaa, kisiat paasisakka naapertorlugit suli aaqqinneqarsimanngilaq. Taamaammat Ammerivik piaarnerpaamik attaveqarfigineqartariaqarpoq - suniartoruna? Isorliunerusut qanoruna eqqarsaateqarfigigai? Taanna paasisariaqarparput.
Finn Karlsenip taama oqarnerminut tunngaviginerarpaa, Naalakkersuisut piginneqatigiiffinnut ingerlatseqatigiiffinnullu naalakkiisinnaatitaannginnerat.
- Taanna annertuumik ajornartorsiutaavoq, tamakkiisumik pigisatsinnut Naalakkersuisutut akisussaatitaagaluarluta, Piginneqatigiiffinnut inatsit malillugu naalakkiisinnatitaanngilagut. Kisianni oqaloqatigiinnikkut aaqqiisinnaaneq qaninnerpaasarpoq. Kisianni apererusunnarpoq manna tikillugu sooq soriarsimannginnersut.
- Nunaqarfinni isorliunerusunilu ataasialinngilaq tunitsiviit matusarlutik. Pissutsit sooruna taamaaginnartut?
Finn Karlsen akivoq:
- Eqqarsaatigissagutsigu taamaappoq, kisianni Ammerivimmut tunngatillugu isorliunerusut taama pineqarnerat - uffalu allanik inuussutissarsiuteqanngitsut - akueriuminaatsorujusuuvoq. Sullissinissamullu isumaqatigiissummik piginnaatitsinikuulluta aningaasaliinikuullutalu, taamaattumik aningaasat atugaassammata suliaqartariaqarput tigooraasoqartariaqarlunilu.
Namminersornerullutik Oqartussat piginneqatigiiffiit taavalu Naalakkersuisut akornanni ammatitsiniarnermullu tunngatillugu pissutsit ajornartorsiutaasarput.
- Ilumoorpoq ajornartorsiutaasarput. Namminersornerullutik oqartussat tamakkiisumik piginngikkaluarpassulluunniit, piginneqatigiiffiusumik ingerlatsiuffiunera pissutigalugu assorujussuaq ajornartorsiuteqarpoq, inatsisit malillugit ingerlatseqatigiiffiit attoruminaatsorujussuupput, uffa Namminersornerullutik Oqartussanit pigineqaraluarlutik.
Finn Karlsen nangippoq.
- Taamaakkaluartoq allatut ajornartumik uanga akisussaaffikka piniartut aalisartullu illersortariaqarlugit misigisimasarama, ilaannikkut immaqa pisinnatitaaffiga qaangerlugu sakkortuumik uparuaasarpunga, uffa taakkua namminneerlutik akilersinnaasumik ingerlatsinissartik aamma ingerlaffigisussaagaluaraat.
Finn Karlsen aperaarput pissutsit iluarsivissapata qaoq iliortoqartariaqarnersoq.
- Pissutsit iluarsivissappata pitsaanerpaassagunarpoq Ammeriviup siulersuisui oqaloqatigalugit; ilaa qanoruna ingerlaniartoqartoq? Immitsinnut ilaanni ungasippallaartugut misigisimanarsisarami pissutsit taamatut ingerlaleraangata - matusaqattaarlutillu ammartarlutillu, matusoqarsimaneralu kingusiinnakkut paasisarlutigu.
Piniartut allamik periarfissaqarpianngillat, ameerneq kisiat. Taamaattoq allatigut periarfissaqalersut Finn Karlsen oqarpoq.
- Ilumoorpoq allanik periarfissaqanngitsorujussuusut. Taassuma saniatigut takornarissanik angallassinermut tunngatillugu isertitamikkut 50 procentit qaangeraangatigik allagartaarneqartarnerat atorunnaassaaq. Inatsisartut upernaaq ataatsimeernerminni aalajangerpaat takornarianik angallasisarnerminni isertitamik 50 procentiat qaangeraluarunikkulluunniit allagartatik annaasarunnaassagaat, naatsorsuutigaarpullu tamanna ukioq manna naatinnagu atuutilissasasoq, Aalisarnermut Piniarnermullu Naalakkersuisoq Finn Karlsen oqarpoq.
