Illoqqortoormiuni piniartut takornariaqarneq iluaqutigilluarpaat

Illoqqortoormiuni takornariat amerliartuinnarput, piniartullu takornarianik qimussiussisartut tamanna malugilluinnarpaat.

21-nik ukiulik Marius Madsen Illoqqortoormiuni piniartut inuusunnerit ilagaat, taassuma takornariat aningaasarsiorfigillualerpai.

- Marius Madsen marsimi takornarianik angallassisalerputit, qanoq ippa takornarianik angallassisalerluni?

- Ajunngilaq, nuanneqaaq, angalaneq nuannertaqimmat, akivoq.

Taanna aperaarput takornarianik marlunnik angallassiguni angalaneq ataaseq qanoq akissarsissutigisarneraa.

- Angalaneq ataaseq ulluni arfineq-marlunni takornariat marluk qimussiullugit 11.500 missaanniittarpoq. Tassalu imaappoq, takornariaq ataaseq ullormut 1000 koruuneqartoq, oqarpoq.

Taanna apereqqipparput qaammatit pingasut ingerlanerini qanoq aningaasannatsiginersoq.

- 40-50.000 koruunit missaanniipput, nannuttakka pingasut ilanngullugit. Nannup amia ataaseq 8-10.000 koruunit missaani akeqartarpoq, Marius Madsen oqarpoq.

Illoqqortoormiuni takornariaqarnermi sullissisut siulersuisuisa siulittaasuat Klaus Søgaard oqarpoq, takornariat nunarsuarmi assigiinngitsuneersuusartut, ilaatigut japanimiut, svenskit, New Zealandimeersullu qimusseriarlutik tikittartut.

Klaus Søgard oqarpoq, Illoqqortoormiuni takornariat ukiut siuliinut sanilliullugit 60 procentimik qaffariarsimasut.

21-nik ukiullip Marius Madsenip takornarianik angallassisarnini nuannarilluarpaa, taanna aamma outfitteritut (tassa takornariartitsisartutut) kitaani pikkorissarnissaminik neqeroorfigineqaqqammerpoq.