Illoqqortoormiuni naartusut tamarmik aaversinnissaminnik neqeroorfigitittalissapput
Illoqqortoormiuni naartusut tamarmik aaversinnissaminnik neqeroorfigittalissapput. Tassuuna takuneqarsinnaassaaq avatangiisit mingutsinneqarnerisa kingunerisaanik qanoq naartusut timaanni toqunartoqartiginersoq, Peqqissutsimut naalakkersuisup Asii Chemnitz Narup neriorsuuteqarpoq.
Naalakkersuisunut ilaasortap Danskit issittumi peqqissutsimik misissuisarfimmeersut ullumi ataatsimeeqatigai. Pingaarnertut oqaluuserisassaraat Illoqqortoormiuni inuit timaasa toqunartoqarnerinik misissuineq. Tappavani avatangiisit mingutsinneqarnerisa kingunerisaanik innuttaasut timaasa toqunartoqassusaat 2001-imi aaviilluni misissuiffigineqarmalli misissuisoqaqqissimanngitsoq paasineqarpoq. Aaviisarnissap aaqqissuussaasimannginnera tamatumunnga peqqutaavoq. Tamanna allanngortariaqartoq Asii Chemnitz Narup oqarpoq:
-Illoqqortoormiormiut aaversittarsinnaanerannut apeqqummut tunngatillugu neqeroorutip nalorninaatsuunissaa pingaartippara. Isumaqatigiissutip ukiut siuliini pisortatigoortumik isumaqatigiissutaanngimmat nalornisoqarsimavoq. Massakkullu tassa isumaqatigiippugut naartusut kikkulluunniit siunissami aaversinnissamik neqeroorfigineqartassasut. Taamaalilluni pineqartut aavisa savimminissamik arrortikkuminaatsumik akoqarnersoq malittarineqarsinnaalissammat.
Ilisimaneqarpoq nunarsuarmi mingutsitsineq annertusiartortoq. Aamma ilisimaneqarpoq mingutsitsinerit immakkut silaannakkullu nunatsinnut apuuttartoq. Taamaammat innuttaasut peqqissusaat ajunnginnerpaamik illersussagutsigu isumaqarpunga tamatumuunakkut aamma malittarinnilluarnissarput nakkutilliilluarnissarpullu avaqqunneqarsinnaanngitsoq, Asii Chemnitz Narup oqarpoq.
- Aaversinnerit misissuilluni taamaallaat atorneqassanngillat aamma nunarsuaq tamakkerlugu mingutitsinaveersaarnermi sakkussatut atorneqarsinnaapput, nerisaqarnermut siunnersuisooqatigiit siulittaasuat Gert Mulvad oqarpoq nangipporlu:
- Nunarsuaq tamakkerlugu mingutitsineq akiorniarlugu taamatut aaviisarnissarput pingaaruteqarluinnarpoq. Toqunartut inerteqqutaatilersinnaavagut taamatut aaviisarnitta kingunerisaanik uppernarsaatissat katersoreerutsigit, Gert Mulvad oqarpoq.