Illoqqortoormiuni anorersuarnerani navialisut
Tallimanngornerup tungaanut unnuap qeqqalersoq Illoqqortoormiut sissaanni pissanganartorsiorneqarpoq anorersuup siku sequtsermagu. Uippallerneqarpoq illoqarfimmiut qimmiisa amerlanersaat sikumi pituttaammata taamaammat piniarnermut atortut qimmillu annaanniarlugit ulappunneqarsimavoq.
- Qimmit 100-ut missaat sikumi pituttaammata unnuap qeqqalersoq ulappunneqarpoq qimmit annaanniarlugit, taama KNRimut oqaluttuarpoq qimmiutilik Evald Brønlund.
- Ernutama 13-inik ukiullip ikiorpaanga sissamukarama. Sikuli ima sukkatigisumik sequtserpoq naggataatigut ernutama nikorfaffiata puttaap nunallu akornat imaannanngorluni, taama Evald Brønlund oqaluttuarpoq.
- Allunaasamik nalutsivigineqarpoq qiterminut qilerluagaanik. Kisianni tassa imaanut nillertumut tingiinnarpoq nusullugulu ajunngitsoq nunamut amuneqarpoq. Kisianni unnuaq sininngitsuujusarpunga eqqarsaatiginermut ernutara susimasinnaagaluarnersoq, taama Evald Brønlund oqarpoq.
Taassuma umiatsiaa aquuteralalik singinneqarpoq taannalu atorlugu qimmit, qamutit qamuteralaallu ikaassorneqarput.
- Kisianni qimmit 15-it avasinnerusumi pitussimasut saavigussaapput. Suli ujarlersinnaanngilagut anorlerluni nittaammat. Kisianni aarleqqutigaara qimmit taakku uumasinnaasimanavianngitsut siku sequtsertorujussuummat, taama Evald Brønlund oqarpoq.
Pissanganartorsiornermi inunnik ajoqusertoqanngilaq.
Constable Pyntimi mittarfik sisamanngornermi nalunaarpoq tassani anori 60 knob angullugu sakkortussuseqalersimasoq.