Illoqqortoormiormiut tunitsivissaaleqipput

Illoqqortoormiut kommuneanni piniartut aalisartullu tunitsivigisinnaasaat tamarmik matoqqapput. Tassa amernik tigooqqaavik taavalu Arctic Green Foodip neqinut tunitsivia matoqqapput, tamannalu pissutigalugu inuussutissarsiutigalugu piniartut 25-t missaat ilaqutaallu katikkaanni inuit 100-t missaat isertitaqarniarnikkut eqqugaapput. Illoqqortoormiuni tunitsiveqannginnertik borgmesterip Erling Madsenip assut ilungersunarnerarpaa:

- Tunitsivik maniittoq Arctic Green Foodip ingerlassaa ukiuni kingullerni ingerlasimanngilaq. Tassa imaappoq ukiut kingullit marluk-pingasut qilalukkat nalliusimaaleraangata Arctic Green Food ammartarpoq.

Pissutsit taamannerat Illoqqortoormiuni piniartunut eqquisut Erling Madsen oqarpoq.

- Aamma ukioq manna maajip 15-ianiit puisit amiinik panertunik Nunatta Ammerivianut tunisisarneq unippoq, Ammeriviup Pilersuisullu aaqqiagiinngissuteqarnerat pissutigalugu.

Kommunep Ammerivik siorna ataatsimeeqatigisimavaa, aamma Aalisarnermut Piniarnermullu Naalakkersuisoq taavalu Inuussutissarsiornermut Naalakkersuisoq ukiarmi aamma ataatsimeeqatigisimallugit, maannakkumut ajoraluartumik kinguneqanngitsunik.

Tunitsivissaaleqineq kommunep aningaasaqarneranut eqquisoq Erling Madsen oqarpoq.

- Malugilereerparput ukiumut akileraarutitigut isertitassaraluanik annaasaqarnerput - siornamut naleqqiullugu.

Tunitsivissaaleqineq inunnik isumaginninnikkut aningaasartuutinut aamma annertusaataavoq.

- Piniartoq tunitsivissaqanngikkuni isertitassaqanngikkuni kommune taamaallaat saaffigisinnaavaa. Oqareersinnaavunga kommunep tigoriaannartut aningaasaatai ukioq manna siornarniit ikinneerarsuummata- mianersortumik mannakkut ingerlatsivugut.

Erling Madsen aamma oqarpoq aasaanerani umiarsuaqarnera iluatsillugu tunitsivimmi qerititsiviit nillitaartitsiviillu atorsinnaajunnaarsimammata, taartissaannik nutaanik tikisitsiniaqqullugit Arctic Green Foodikkormiunut siornali ilisimatitsissutigisimallugit, maannamulli akineqarsimanatik. Arctic Green Food aggustimi mattannik tigooqqaalernissaa pillugu ilisimatineqarsimallutik aamma oqarpoq.

Naalakkersuisut ilisimatitsisimapput amernik tigoqqaaviup piaartumik ammaqqinneqarnissaanik piumasaqaat Ammerivimmut nassiunneqareersimasoq.