Illoqqortoormiormiut naartusortaat siunissami Nuummut erniartortalissapput

Politikerimmi kiffartuussinissamut isumaqatigiissut ”eqqarsaatigilluarlugu” allanngortimmassuk Kommuneqarfik Sermersuumi peqqinnissaqarfik eqqarsaatigisimagunnanngilaat. Isumaqatigiissummi nutaaq naapertorlugu juumuut peqqissaasullu Nuummeersut Illoqqortoormiuliarlutik kiffartuussisariaqassapput.

- Tassa kiffartuussinissamut isumaqatiissusiaq nutaaq puaatsoornarunaraluaqisoq Illoqqortoormiormiut Nuummiit kiffartuulluaneqarnerusalissapput. Isumaqatigiissutitoqarmi naapertorlugu Tasiilami katsorsaavimmeersut Illoqqortoormiuliarniarunik Nuuk aqqusaaqqaartariaqartarmassuk, tassa uiartererujussuaqqaartarlutik. Illoqqortoormiormiullumi allannguutaasussanut ataasinnguamilluunniit pisuussuteqanngimmata qanorluunniit ikiorsertariaqarpavut, Dina Berthelsen, Kommuneqarfik Sermersuup naalugiarsunnik isumaginnittoqarfianeersoq knr.gl-imut taama oqarpoq.

Aamma pissusiulersut pillugit naalugiarsunnik isumaginnittoqarfimmiut suli eqqartuinngikkaluarput, ajornartorsiutaalersussalli aaqqiiffigineqarnissaat pimoorunneqalerluni. Taamaammat Illoqqortoormiormiut Nuummiit siunissami kiffartuunneqartalissapput.

- Tunumiut ernisoqqajaasunut tamanna nuannerunanngikkaluaqaaq. Taakkunnguakkuluimmi sermersuaq ikaarlugu kilometerinik tusintilikkaanik timmisartoqqaarlutik erniartortariaqartalissapput, ernilerpatalu ilaqutaasut akuusinnaajunnaassallutik. Ajornartorsiut taanna siunertaasimagunanngikkaluarpoq, allatulli ajornartumik ernisuttussat peqqinnissaqarfimmiullu ukiortaamiit ajornartorsiutaalersussaq atugarisariaqassavaat, Dina Berthelsen taama isummersorpoq.

Pissutsit nutaat kingunerisassaasa ilaat tassaavoq peqqinnissaqarfiup aningaasartuuteqarnerulernissaa, tamannali aporfigiinnarnagu ajornartorsiutaalersussat pitsaanerpaamik qanoq atorneqassanersut maanna pilersaarusiorneqaleruttorput:

- Tasiilami suleqativut siornatigut qanoq iliuuseqartarsimanersut maanna misissuleruttorparput. Ilami ernisukkiartortut qanoq amerleriartigissanersut suliluunniit ilisimanngilarput. Illoqqortoormiormiulli ernumanissaminnut pissutissaqanngillat. Tassami naalugiarsuttaasa kiffartuunneqarneri ajorseriassanngimmata. Aamma piffissap ilaani Illoqqortoormiormiut peqqissaasunit tikeraarneqartassapput, atorfissaqartinneqartillutalu tamatigut takkuttuaannarniarluta, Dina Berthelsen taama neriorsuivoq.