Illoqqortoormiormiut alutorsartut alutorsaatigineqarlutillu

Tyskit takornarniartaassuat M/S Europa Illoqqortoormiunut ippassaq ualikkut tikippoq. Illoqarfik tamarmi aalassappoq, umiarsuarmi pajuttoq takornariat peqatigingajallugit ukioq manna siullermeerluni aamma tikimmat. Takornariartitsinermut pisortaq Karina Bernlow oqaluttuarpoq umiarsuaq nannunit marlunnit aamma tikilluaqquneqarsimasoq.

-Tamarmik ajunngilluinnartumik ingerlapput pitsaanerusinnaanatillu, iluatsitserujussuarpugut silageqimmat seqinnarillunilu, taavalu illoqarfiup avataatungaani nannut marluk nalullutik, taamaalillutillu takornariat assorsuaq iluarisimaarinnillutik, takornariammi Kalaallit Nunaannut niunissartik ilisimareersimanngilaat, taamaalillutillu tupaallatsinneqarlutik umiarsuarmiit taamatut aaqqissuussisoqarsimammat. Taamaammat ulloq misigilluavippaat, uagullumi illoqarfimmiittugut aamma taamaalluta.

-Taakkununnga suut ataatsimut aaqqissuuppisigik?

-Takornariartaassuit illoqarfimmut maanga tikinneri tamaasa illoqarfimmi neqerooruteqartarpugut, aasallu tamaasa 20-t missaannit tikinneqartarluta.

Aaqqissuussinermilu sullissiveqarfiit assigiinngitsut ammasarput, politeeqarfik oqaluffillu ammasarput, tamatumalu saniatigut umimmaap nannullu neqaanik ooqattaarisitsisarluta, nunalu allanngutsaaliugaq assilineqartarpoq, aamma piniartut tammaarsimaffiat sanavarput tassanilu piniartut sakkui assigisaallu takuneqarsinnaallutik.

-Ulapputeqaavut amerlaqisullu sulillutik, ingerlalluarpugut naak umiarsuaq pajuttoq aamma tikikkaluartoq, umiarsuarmi pajuttoq ukioq manna aatsaat tikimmat. Taamaattumik suliat imaannaanngillat, tassami illoqarfik tamangajammi sulisutut immat, Karina Bernlow naggasiivoq.