Illoqqortoormiormiut aarleqquteqarput
Kommuneqarfik Sermersuumi illoqarfiit inukinnersaasa Illoqqortoormiut aappagumiit 56 millionit koruuninik kommuninut allanut pilliuteqartariaqalernera ernummatigineqalerpoq:
- Aarlerinarpoq. Qaamaneqaleruttortoq manna saqqummiunneqarpoq, Atassut sinnerlugu kommunalbestyrelsimi ilaasortaq Erling Madsen, Illoqqortoormiuneersoq oqarpoq.
Illoqqortoormiut 450-it missaannik inoqarpoq, kommunimilu sullissinerup ataatsimut isigalugu pitsanngorsaavigineqarniarnera Illoqqortoormiut nuannaarutigisimaqaat, Illoqqortoormiunilu illut 36-t iluarsaavigineqarnissaat pillugu Aningaasaqarnermut Ataatsimiititaliaq aningaasaliissuteqaqqammerpoq, aappaagumullu nutaanik illuliortoqarnissaanik aamma pilersaaruteqartoqarluni.
Pilersaarutit taakku kommunimi aningaasaqarnikkut atugassarititat ajornerulersinneqassappata ajalusoorsinnaanerat, Erling Madsenip aarleqqutigaa, Kommunqarfik Sermersuumi ataatsimut ilanngarterisoqassappat Illoqqortoormiut eqqugaanerlunnissaat aarleqqutigalugu:
- Kommunimut kattukkattali isumaginninnikkut ikiorsiissutit qaffasinnerulernikuupput. Illoqarfitsinni isumaginninnikkut ikiorsiissutinik pisartagalippassuupput, taamaattumik ikilisaasoqassappat tamatta eqqugaanerlussaagut, Erling Madsen oqarpoq.
