Illoqqortoormiormiuaqqat eqqumiitsuliamik qalipagaliorput
Atuartunik qalipaanermik sammisaqartitsineq Bentzonip septembarip qaammataani ingerlappaa. Atuarfiup iigaani qalipagarsuaq tamatuma inerneraa.
Qalipakkami najoqqutarineqartut Evap meeqqallu peqatigiillutik toqqarpaat. Meeqqat Illoqqortoormiuni avatangiiserisatik Eva Weis Bentzon peqatigalugu isumassarsiorfigaat. Qalipakkamilu takuneqarsinnaasut ilagaat iluliarsuit, timmissat, puisit illullu meeqqat najugaqarfigisaat.
- Atuartut suleqatigineri assorsuaq nuannerpoq, Eva Weis Bentzon oqarpoq.
Eva Weis Bentzon qaammat ataaseq Illoqqortoormiuniippoq, tassami titartaanissaminut, qalipaanissaminut assiliinissaminullu legatimik tunineqarsimagami.
Eva Weis Bentzonip atuartunik qalipaanermik sammisaqartitsinissaa aallaqqaammut pilersaarutaanngikkaluarpoq. Tamanna Nanu Travelip Ejnar Mikkelsenillu Aluarpianilu pisortaasup, Gustav Brandtip, isumassasiaralugulu piviusunngortippaat.
