Illoqqortoomiuni nerisassanik amikkisaarput

Allaallu allatut ajonartumik ilaasa kalaaliminiutitik sipaartunnguamik inuuniutigisariaqalersimavaat.

- Ajornartorsiut annertuvoq, qangarsuarli taanna ukiut tamaasa atortuarparput. Ukiut tamaasa ukiup taamaalinerani umiarsuit tikittussannguleraangata suutaarutiivittarpugut. Ullumikkut sualuuippoq. Ullaakkorsiutissat, qallersuutissat, igaassarpassuit, meeraaqqanut meeqqanullu atugassat, nanginut allaat. Naatitaqanngilaq, naatsiiaqanngilaq. Suut tamarmik nunguttartussaanngikkaluit nungutsiterput, Illoqqortoormiuni innuttaasoq, Jens Madsen oqarpoq.

Umiarsuaq pajuttaat ukiumut marloriaannarluni Illoqqortoormiunut pajuttarpoq. Innuttaasullu kissaatigigaluarpaat umiarsuaq pajuttaat ukiumut arlaleriarluni Illoqqortoormiunut tikittarnissaa. Ilaannilu tikinnissaagalua kinguartinneqartartoq, Jens Madsenip oqaatigaa. Naak qaammat naaleraangat aningaasanik nunguutsiffiusaraluartoq, Illoqqortoormiormiut suli aningaasaateqartarput, kisiannili atorsinnaanagit, pisiniarfiimmi pisiassaateqarpiannginnamik. Nerisassakilliornerlu innuttaasunut kipiluttunartuusoq, Jens Madsenip oqaatigaa.

- Assorujussuaq innuttaasunut sunniuteqarpoq. Tamatsinnut ilungersunartorujussuuvoq. Umiarsuaq pajuttussaq qaammat naappat tikittussaagaluaq kinguartinneqarsimavoq. Tamanna assut kipiluttunaqaaq.

Nerisassanik sipaartariaqartut
Allatut ajornartumik igaassanik qerisunik, qaangiunnikunillu pisisariaqartarput. Aammalu kalaaliminiutillit sipaartunnguamik kalaaliminiutitik nerisariaqartarsimavaat.

- Kalaaliminiutillit sipaarrappugut, taavalu pisiassamininnguit sinneruttut pisiarisinnaasagut tassaapput igaassat ullui qaangiuttoornikut. Aamma qillertuusanik puullit nerisaraagut, Illoqqortoormiuni innuttaasoq Jens Madsen oqarpoq.

Nerisassat ulluinnarsiutaasartut pisiniarfinni nunguttarput, imigassat nunguttussaajunnaarlugit tikisinneqartarneri aamma Jens Madsenip isornartorsiorpaa.

Royal Arctic Linemi umiarsuit ingerlaarnissaannik suliaqartoq, Klaus Dupont Iversenip oqaatigaa umiarsuup ukiumut arlaleriarluni Illoqqortoormiunut tikittarnissaa ajornakusoortoq, sikoqarpallaartarnera pisuutaalluni.