Illoqarfiup tv-qarfia aliikkusersuissamaalerpoq
Nipilersortoqassaaq, nalorsitsaarisoqarluni erinarsoqatigiittoqartarlunilu Arctic TV’p aaqqissuussaa ’Aliikkusiarfik’ arfininngornermi unnukkut kulturip illuani Sermermiuni pilerpat, tassanilu iserneq akeqassanngilaq.
Illoqarfiup tv-qarfiata aaqqissuussanik annertunerusunik suliaqarneq misilittagaqarfigilerpaa siorna juullimut aliikkusersuineq immiukkamikku decemberip 23-anilu aallakaatillugu.
- Aliikkusersuinerit annertuut arlallit aallakaatitassiarinissaat maanna piareersarparput. ’Aliikkusiarfiup’ saniatigut juullimut aliikkusersuineq aamma timersullammammik toqqaaneq immiunniarpagut tassanilu nipilersortunik akunnilersorlugit aliikkutassiarinissaat pilersaarutigaarput, Arctic TV-mi pilersaarusiortoq Linda Jeremiassen KNR-mut oqarpoq.
Erinarsortartut Kristine Thomsen, Edvard Geisler, Sandra Jeremiassen aamma nipilersoqatigiit Kalak Jazz arfininngornermi unnukkut appisimaassapput aliikkusersuinermi nalunaaqutaq arfineq marlunut aallartittussami. Isiginnaariat nalorsittaarunnissami aamma peqataatinneqassapput.
- Aaqqissuussami aningaasartuutit oqimaaqatigiinnissaat iluatsissimavarput. Taamaattumik aalajangerpugut iserneq akeqassanngitsoq, Linda Jeremiassen oqarpoq.
Sermermiuni inissat killeqarmata isissutissat arfininngornermi ualikkut nalunaaqutaq marluniit sisamat tungaannut kulturip illuanut Sermermiunut aaneqarsinnaapput.
