Illoqarfinni tamani umiarsualivinni aggustimi nuannisartitsisoqalersoq

1993-mili umiarsuarni aappaluttuni Kalaallit Nunaannut, Kalaallit Nunaannilu illoqarfiit akornanni nioqqutissanik assartuisartuni, avammullu tunisassianik nunanut allanut assartuinissamik akisussaaffeqartuni Royal Arctic Linemik allassimasoqalerpoq.

Nalliuttorsiorneq illoqarfinni tamani umiarsualivinni ilaqutariinnut nuannisartitsinermi malunnartinneqassaaq.

- Ukiut 20-t amerlanngillat, ukiullu taakku akunnaatsooqqarput, kisianni isumaqarpugut tamanna nalliuttorsiutigissallugu peqqutissaqarluartoq, Royal Arctic Linemi pisortaaneq, Jens Andersen oqarpoq.

- Sulisut 800-ngajaat ullut tamaasa inuiaqatigiinnik kalaallinik sullissisartut qanimullu suleqateqartartut. Tamanna malunnartinniarparput augustip ingerlanerani illoqarfinni tamani umiarsualivinni nuannisartitsinermut qaaqqusilluta. Isumaqarpunga kaagillerlutalu kaffi/tii-mik saftimillu ilaqutariinnut sassaalliinissarput persuarsiutiginngikkaluarlugu nuannaarluni naapinnissamut periarfissaalluartoq.

Umiarsualivinni nuannisartitsinerit siulliit pissapput Upernavimmi Ilulissanilu 9. august, Aasiaat 10. august, Sisimiut 16. august. Nuummi umiarsualivinnilu allani  nuannisartitsineq pissaaq  17. august.

Umiarsualivinni nuannisartitsinissanut tamanut – ualikkut pisussanut – ullut piffissallu  illoqarfinni ataasiakkaani nalunaarutigineqarumaarput.