Illoqarfinni suliffissaaleqisut amerliartorput
Siorna suliffissaaleqisut agguaqatigiisillugu 2.800-pput, tassa procentinngorlugu 8,8 procentiullutik. Kisitsisit ukioq 2010-mut naleqqiutissagaanni suliffissaaleqisut 2.400-pput, tassa procentinngorlugu 1,2 procentinik amerleriarsimallutik.
Sisimiuni suliffissaaleqisut amerleriarnerpaajupput, Sisimiormiummi 292-it suliffissaaleqisutut nalunaarsorneqarput, tassa suliffissaaleqisut 111-nik amerleriarput, tassa Sisimiormiut suliffissaaleqisut procentinik pingasunik amerleriarmata suliffissaaleqisut 8,1 procentinngorsimallutik.
Siornali Sisimiuni Royal Greenlandip tunitsivia nutarsarneqarmat ukiup qaammataasa siullii tallimat matoqqasariaqarsimavoq, assagiarsunnillu tunitsivik ukiut siuliinut naleqqiullugu kingusinnerusukkut ammarneqarsimanera suliffissaaleqisut amerleriaateqarnerinut pissutaaqataasut Kalaallit Nunaanni kisitseqqissaartarfiup oqaatigaa.
Siorna suliffissaaleqisut 2.800-sut akornanni angutit amerlanerpaajupput, tassami angutit suliffissaaleqisutut nalunaarsorneqarsimasut 1.600-pput, arnallu 1.200-llutik.
Illoqarfiit suliffissaaleqiffiunerpaat tassaapput Qaanaaq, Illoqqortoormiut Kangaatsiarlu, taakkunanimi innuttaasut sulisinnaasut akornanni 20 procentii suliffeqanngillat.