Illoqarfinni sisamani eqqaaviit erinarsortartut
- Suni tamani eqqaaveqarpugut, aammalu neriuutigaarput, paasititsiniaanerup pitsaasup tamatta puiaasanik, pappiaqqanik cigaretikutsinnillu igitsiniarluta eqqaaviit tungaannut ikittunnguanik allortalernissarput nassatariumaaraa, Avatangiisinut Pinngortitamullu Naalakkersuisoq Kim Kielsen oqarpoq.
Qujanaq paasititsiniaanermut, inuit tamarmik eqqaavinnik atuisalernissaannut anguniagaqarfiusumut atsiunneqarpoq. Taanna maajimi aallartissaaq, septembarillu tungaanut ingerlassalluni.
- Kalaallit Nunaata minguinnerulernissaata aallunneqarnerunissaa anguniarlugu oqaluttuaq nuannersoq toqqarparput. Taamaattumik eqqaavinnik atuisut tamaasa qujalluta erinarsorfigisarniarpavut. Igitassanik eqqaavimmut igitsigaanni pinngortitamik minguinnerulersitseqataasoqassaaq, tamannalu tamatta soqutigisaraarput, Kim Kielsen oqarpoq.
Meeqqat paasititsiniaanermi Qujanaq-mi immikkut suliniuteqarsimasut Naalakkersuisoq oqaluttuarpoq. Maniitsup atuarfiani aamma Nuup Atuarfiani 6. klassini atuartut Julie Berthelsen peqatigalugu tusarnaartitsissapput, erinarsuut Qujanaq namminerluinnaq ilusilerlugu erinarsussallutik nipilersussallutillu.
Maniitsumi pingasunngornermi maajip ulluisa 21-anni aamma Nuummi tallimanngornermi maajip ulluisa 23-anni tusarnaartitsisoqassaaq, taakku marluullutik nal. 16 pissallutik. Juliep meeqqallu tusarnaartitsinissaannut marluusunut tusarnaariarnissaq akeqanngilaq.
