Illoqarfinni nunaqarfinnilu arlalinni avissaarusuttoqarneruleriartortoq

Kommunit 18-init tallimaannanngortinneqarlutik kommunerujussuanngortinneqarnerat 2019-ip missaanili oqaluuserineqalerpoq.

Ukiunilu kingullermi oqallinneq annertunerulerluni. Taamaammat naalakkersuisut kommunit tallimat aaqqissuunneqarneranik naliliinissamik suliaqartitsipput, taannalu maanna piareerpoq, inerniliissullu ersarippoq.

‘Innuttaasut kommunalbestyrelsit sulinerannik innuttaasunullu attaveqartarnerannik naammagisimaarinninnerat appasippoq’, inerniliissummi allassimavoq. Nunatsinnilu tamarmi taamaappoq.

Naak inerniliissut pakatsinaraluartoq tamanna Palle Jeremiassenip (parteeqanngitsoq) imaluunniit Ane Hansenip (IA) Avannaata Kommuniani Kommune Qeqertalimmilu borgmesteriusut tupaallaatiginngilaat.

- Tassa tupaallannartunik arlalinnik imaqarpoq aamma naatsorsuutigereersimasannik, Ane Hansen oqarpoq.

- Inerniliussaasoq tupaallaatiginngilara. Aamma taanna uagut qangali oqariartuutigisartakkagut taassuma uppernarsaannarpai, Palle Jerimiassen nalunaarusiaq takoreerlugu oqarpoq.

Innuttaasut ilumoortut

Palle Jerimiassenip innuttaasut isornartorsiuinerannik nalunaarusiami ersersinneqartumi ilumoornerarpai.

- Innuttaasut oqartussaaqataanerminnut tunngasut naammaginngilaat, sullinneqarnerminnut tunngasut naammaginngilaat taamaattumik tupaallaatiginagulu aamma oqaannarpunga suu ilumoorpoq taamaappoq, taanna oqarpoq.

Avannaata Kommuniata tamatumunnga aaqqiissutitut Avannaata Kommunia agguarniarpaa, taamaammat innuttaasut tamatuma qanoq kinguneqarnissaanik paasissutissiiffigisalereerpaat, aamma naak inerniliineq pisortatigoortumik saqqumminngikkaluartoq.

- Aap massakkut tiguarput, taava kisianni naalakkersuisut ippassaaniinnannguaq oqarput taava aamma aaqqissuusseqqinnissamut ataatsimiititaliortariaqarpugut, alloriaqqinnissap tullia alloriarfiginiarutsigu uanga taanna kinguarsaanertut isigivara, Palle Jerimiassen oqarpoq.

Kommune Qeqertalimmut iluaqutaasoq

Kommune Qeqertalik kommunip avinneqarneranik misilittagaqarpoq, tassanilu Ane Hansen borgmesteriuvoq. Taassumalu kommunip Kommune Qeqertaliup Avannaata Kommuniatalu ataatsimoorfiginikuusaanit, Qaasuitsup Kommunianit avissaarnera kommunimut qanoq iluaquteqarsimanersoq isertuutinngilaa.

- Qaasuitsup kommunia avissaarmat, avinneqarmat imatut ineriartortitsinikuuvugut, nunaqarfimmiikkaanni illoqarfimmiikkaanniluunniit atugassarititat assigiissarnissaata tungaanut sulilluta taanna suliassaq oqimaatsoorujussuuvoq kisianni piumassuseqarfigigatsigu alloriallattaanikuuvugut naak alloriarniarneq oqimaakkaluaqisoq, taanna oqarpoq.

Taamaammat nunatsinni kommunini kisiartaalluni avinneqarnissamut kissaateqanngilaq. Aamma naak Ane Hansenip oqarnera naapertorlugu Kommune Qeqertaliup namminerisamik kommuneqalernini iluaqutiginikuugaluaraa kommunit allat taama suliniuteqalinnginnerminni eqqarsarluaqqaassasut borgmesterip kaammattuutigaa.

- Isumaqarpunga eqqarsaatigilluaqqissaartariaqartoq soorlu avissaarumasut ilai inuttussusai eqqarsaatigalugit aningaasarsiornikkut isertitai eqqarsaatigalugit nukissaq annikittuararsuanngussammat taamaattumillu aamma innuttaasut atugaannut sunniuteqassammat taanna.