Illoqarfinni arlalinni suli imigassamik killilersuisoqassaaq
Tamanna peqqissutsimut naalakkersuisup Agathe Fontainip Justus Hansenimut Demokraatineersumut akissutaani atuarneqarsinnaavoq.
Illoqarfinni taaneqartuni imigassamik killilersuinerit atorunnaarsinneqassanersut aamma atornerluinermut pinaveersaartitsinermik suliaqartoqarniarnersoq, paragraf 37 najoqqutaralugu Justus Hansenip apeqqutigaa.
Agathe Fontainip akissummini erseqqissarpaa, killilersuinerit maanna atuuttut kingunerinik - politiinit ilisimatitsissutigineqartutut - nakuusernerit, angerlarsimaffinni eqqissiviilliornerit aamma suliassat meeqqanut inuusuttunullu pitsaanngitsumik sunniuteqartut ikileriarsimasut.
Taamaattumik maanna imigassamik killilersuilluni tuniniaanermut allannguerusulluni kommunalbestyrelsinit saaffiginnittoqanngippat, Naalakkersuisut allatut iliuuseqarnissaminnik pilersaaruteqannginnerarlugit.
Innuttaasuni imigassamik isiginnittarnerup allanngortinniarneranik suliniuteqarneq ingerlaannassasoq Agathe Fontain erseqqissaavoq.
Taamatut suliniuteqarneq kommunit suleqatigalugit ingerlanneqarpoq, tassami kommuninik aaqqissuusseqqinnerup kinguneranik pinaveersaartitsinermik suliaqarneq kommunit akisussaaffigilermassuk.
Imigassaq ikiaroornartorlu pillugit siunnersuisoqatigiit 2011-mi ukiakkut isumasioqatigiissitsiniarput, qulequtaralugu "Pissutsit allanngortinnissaannut piffissanngorpoq". Agathe Fontain Justus Hansenimut akissummini taama ilisimatitsivoq.
