Illoqarfinni annerni iluanaarutissat annerupput
Iluanaarusukkuilli tuaviortariaqarputit.
Utaqqeqqinniaruimmi iluanaarutissatit ikileriarujussuassapput. Tamatumunnga pissutaavoq 2008-mi januaarip ulluisa aallaaqaataani aaqqissuussinerup allanngortinneqalernera. Maannakkut aaqqissuussineq atuuttoq naapertorlugu teknikkikkut tunngasutigut aningaasatigullu nalilersuineq tunngavigalugit inissiavit nalinga nassaarineqartarpoq. Tassa, akiliutissaq angissusilerneqartarpoq inissiap angissusaa qanorlu issusaa tunngavigalugit, apeqqutaatinnagu qanoq isikkivigitsigisumiinnersoq. Taamaattumik peqqussut maannakkut atuuttoq naapertorlugu inissiat Kalaallit Nunaanni illoqarfimmi sumiikkaluaraanniluunniit assigiimmik akeqarput. 2008-mili januaarip allaqqaataaniit tamanna allanngussaaq, inissiap pilerinassusaa naapertorlugu aki aalajangersarneqartalissammat. Taamaalippat inissiap akianut illoqarfimmi angisuumiinneq minnerusumiinnerluunniit aamma apeqqutaaqataalissapput, Naatsumik oqaatigalugu illoqarfinni inoqarluartuni soorlu Nuummi paggattussat amerlanerummata inissiat akisunerulissapput minnernilu pisisussakinnerusuni akikillillutik. Peqqussummi nutaami qanoq sivisuumik ineqarsimanerup akikillisaataasinnaanissaa ammarneqassaaq tamatumali allanngortinnavianngilaa Nuummi illoqarfinnilu allaniannerni aki qaffakkumaarmat minnernilu apparluni. Aaqqissuussineq attartortumiit piginnittumut atuutilermalli, illut taamaallaat niuerutaanikuupput taamaattumik inissianik eqqartuinermi taggiineq annermik atorneqarpoq, nineqarnermullu pisortaqarfiup illunilluunniit tuniniaasartut taggiinerat assigiinneq ajorpoq assortuussutigineqanngilarli massakkut pisigaanni aningaasarpassuit sipaarneqarsinnaasut, sualummik Nuummi. Radioavisip naliliititai naapertorlugit Nuummi januaari aallaqqaataatinnagu inissiarsigaanni hundretusintilikkuutaat sipaarneqassapput. Kommunip inissiaataani najugaqaraanni attartugaq ingerlaannaq pisiarineqarsinnaavoq Namminersornerullutilli Oqartussat inissiaataannik pisiniaraanni blokkimi najugaqartut 75 procentii katersoqqaartariaqarput.
----------------------------------------------------------
Naggasiut:
Peqqussut maannakkut atuuttoq naapertorlugu Namminersornerullutik Oqartussat kommunillu illuutaannik pisisoqarsinnaanngilaq. Periarfissaq unitsinneqarpoq paasineqarmat, inatsisartuni ilaasortat, naalakkersuisut pisortanilu atorfikkaat akikinaaralutik illusiortortut.
