Illoqarfinni anginerusuni suliffissaaleqisut ikileriarsimapput

Allattoq Jaaku Lyberth
apriilip 19-at 2007 17:08

Illoqarfinni suliffissaaleqisut ikinnerulersut

Illoqortoormiuni suliffissaaleqisut amerlanerusimapput Paamiunilu suliffissaaleqisut ikinnerusimallutik. Kalaallit Nunaanni Naatsorsueqqissaartarfiup paasissutissiissutaanni kisitsisit nutaat taamatut takussutissiipput.

Kisitsisit ataatsimut isigissagaanni 2006-imi illoqarfinni suliffissaaleqisut ikileriarsimapput ukiumut siulianut naleqqiullugu. 2006-imi suliffissaaleqisut eqqoqqissaartumik oqaatigissagaanni 141-nik amerlassuseqarsimapput. Suliffissaaleqisut annikkilleriarsimanerat illoqarfissuarni soorlu; Nuummi, Sisimiuni kiisalu Paamiuni kujammut killigalugit malunnarnerpaasimapput.

Illua´tungaanullu qiviarutta; Illoqortoormiut suliffissaale-qiffiunerpaasimapput. Illoqarfiit 2006-imi suliffissaaleqiffiusut allat tassaallutik; Aasiaat, Narsaq aamma Qaanaaq kiisalu Ittoqqortoormiut.

Allannguutit annertunerpaat illoqarfinni Aasianni kiisalu Sismiuni pisimapput. Aasiaanni suliffissaaleqisut ukiumi tassani amerleriarnerpaasimapput. Illua´tungaatigullu Sisimiuni suliffissaaleqisut ikileriarnerpaasimallutik.

Kalaallit Nunaanni Naatsorsueqqissaartarfiup kisitsisaataani aamma takuneqarsinnaavoq, nuna tamakkerlugu isigissagaanni angutit arnanut sanilliullugit suliffissaaleqinerusimammata. Kisitsisit aamma paasinarsisippaat suliffissaaleqisut 20 – 24 –nik ukiullit amerlanerpaasimasut, amerlanerpaartaallu ilinniagaqarsimanngitsuusut.