Illoqarfimmi tusaatit marlunngorput
Illoqarfiup tusaatitaava nutaaq, tassa Lokalradioa nutaaq Nuummi ullaaq mannamiit aallartinneqarpoq. Illoqarfimmi tusaatitaaq atserneqarsimasoq ”Warehouse”, ullaaq manna nalunaaqutaq arfineq marlunut aallakaatitsilluni aallartittoq, tassa radiomi maligaasakkut, 102,5-ikkut Nuup illoqarfiani tusaaneqarsinnaavoq.
Illoqarfiup tusaataanik aallartitsisoq siornatigut taxartartuusimasoq Gaba Egede pissarsiarisinnaasimanngilarput.
Illoqarfiup tusaataata aappaata Nuuk FM-ip unammillerneqarnertik ilassilluarpaat. Tuniniaanermut pilerisaarusiornermullu pisortaq Jes Bo Hansen isumaqarpoq nipilersornerinnanngajammik aallakaatitsiviusussat illoqarfigisami tusaatini marluusuni periarfissaqartoq.
- Kisianni illoqarfimmi tusaatitaap pilerisaarutitigut isertitanik napatissinnaanissaa tusaatinut marluusut ajornakusuussasoq. Inuussutissarsiortut tapersiisinnaanissaat killeqassaaq, Jes Bo Hansen naliliivoq.
Nuuk FM-it naalaartartut 104-t apeqquteqarfigisimavaat tamanna qanoq isumaqarfigineraat, 30%-illu isumaqarput Nuuk FM-ip saniatigut tamanna inissaqartariaqartoq.