Illoqarfimmi pilersaarusiortartut naaperngaarput
Sanaartugassanik pilersaarusiornermut akisussaaffiup ukiut 28-t matumuna siornatigut tiguneqarneranili pilersaarusiortut akornanni aatsaat siullerpaamik naapeqatigiittoqarpoq. Naapeqatigiinnermut tunuliaqutaavoq ukiortaaq 2009 kommunit kattussorneri pilersaarusiornermullu inatsisit nutaat atuutilernerat.
Namminersornerullutik Oqartussani sanaartugassanik pilersaarusiornissamut nunap immikkoortuini soqutigisat nalunaarsorneqassapput, kommunikkaartumillu illoqarfinnut, nunaqarfinnut asimilu nunamut pilersaarutit kommunit namminneq suliarisussaasaat eqqartorneqarput. Tamatumani kommunini nunalu tamakkerlugu pilersaarusiornerit pitsaanerusumik ataqatigiissaarnissaat siunertaavoq. Sisimiuni illoqarfimmi pilersaarusiortutut atorfilik Finn Petterson assut pissarsisimanerarpoq.
- Kalaallit Nunaanni pilersaarusiortut ikeqaagut, taamaammat pilersaarusiornermi periaatsit suleriaatsillu oqaluuserinissaat pisariaqartissimaqaarput. Maanna siunissami suleqatigiinnissaq qarmaavigaarput, Finn Petterson oqarpoq.
Kommunit sisamat Namminersornerullutik Oqartussat peqatigalugit siunissami isummaminnik misilittakkaminnillu paarlaateqatigiittarnissaat anguniarlugu pilersaarusiortullu akornanni ataqatigiissaarinissaq siunertaralugu piffissaq iluatsillugu suleqatigiissitaliortoqarpoq.
Pilersaarusiortut Ulluini peqataasut 40-uupput. Naatsorsuutigineqarporlu ukiut tamaasa pilersaarusiortut naapeqatigiittalissasut.