Illoqarfimmi atuarsimasut nunaqarfimmiunit aningaasarsiarinnerusarput

Nunaqarfimmiut meerartaat illoqarfimmiut meerartaattut isertitaqartigineq ajorput, naak assigiimmik ilinniagaqarsimagaluarlutik.
Allattoq Jaaku Lyberth
oktobarip 28-at 2010 11:51

Nunaqarfinni 1971-imit 1976-mut atuartuusimasut ilinniakkaminnik angusaqartut illoqarfinni atuartuusimasunut naleqqiullugit malunnaatilimmik ikinnerupput. Taamatut inerniliillutik oqarput, naalakkersuisut aningaasaqarnermut isumalioqatigiissitaa.

Nunaqarfinni atuartuusimasut 20-it 30-illu akornanni ukiullit ilinniakkaminnik angusaqarput. - Nunaqarfinni atuartuusimasut ilinnikkaminnik naammassisaqartut 30 procentiupput, illuatungaani illoqarfinni ilinniakkaminnik naammassisaqartut affaata missaannik amerlassuseqarput,Aningaasaqarnermut isumalioqatigiissitap siulittaasuata tullia Ulla Lynge, oqarpoq.

Ilinniarneq kikkunnulluunnit akilersinnaajuaannartoq isumalioqatigiissitami naqissuserneqarpoq.

Meeqqat atuarfiannut aningaasaliissutigineqartut tamakkiisumik atorneqarsimanngitsut aningaasaqarnermut isumalioqatigiissitap misissuinerminni paasivaa, taakkua tamakkiisumik atorneqarnissaat pillugu misissuisoqarnissamik isumalioqatigiissitaq piumasaqarput.

- Meeqqat atuarfiini atuartut tululuttut qallunaatullu soraarummeernerminni angusaat annikippallaarput, oqaatsitsigut piginnaasat ilinniaqqinnissamut atugassaapput, Ulla Lynge oqarpoq.

Aningaasaqarnermut isumaliuteqatigiissitap nalilerpaa killilimmik angusaqartartut, taamaalilluni meeqqat atuarfiini ingerlariaqqinnissamut ajornartorsiortoqartoq.

Kalaallit Nunaanni atuarfinnut aningaasaliissutigineqartut nunanut allanut sanilliullugit ikigisassaanngitsut, siunersuisoqatigiit naliliipput. Taamaattumik meeqqat atuarfiini sukumiinerusumik angusarissaarnerusumik siunnerfeqarnerata misissuiffigineqarnissaa isumalioqatigiissitamit inassutigineqarpoq. Naalakkersuisut aningaasaqarnermut isumalioqatigiissitaani siulittaasup tullia, Ulla Lynge, oqarpoq.

Aningaasaqarnermut isumalioqatigiissitap nalunaarusiaa siulleq sapaatit akunnerini tulliuttuni saqqummissaaq.