Illoqarfik toqorusunngitsoq

 Atuakkami sammineqarput inuit 1100-t pinngitsaalisaallutik nuutsitaasimasut taamatumalu kinguneranik atugaat. Ujartorneqarporlu piffissap qanoq ilinerani matuneqarnissaanik aalajangertoqarsimanersoq. Akissutissarli erseqqissumik akissutissarsiuminaappoq.

- Oqaluttuaq misigiqarfiginerpaasara tassaavoq Marie, Qullissani naapitara, oqaluttuartorlu ataatani illoqarfiup matuneqarnissaanik upperinnikkusunngitsoq. Oqarporlu: Kikkunuku taamatut aalajangertut, sooq taama aalajangerpat? Assut eqqarsalersikkaminga, tamakkumi ukiut 40-it qaangiutereermata ilisimasariaqaraluarmata. Paasiniaaleramali paasilluarneruvara, ersernerloqaarmi kikkut aalajangiisuusimanersut.

Søren Peder Sørensen oqarpoq, piaarinaatsoornikkut Qullissat pillugit soqutigisaqalersimasoq. Nulii peqqissaasutut sulisoq aasaangaa 2010-mi Ilulissaniikkamik, misissuilluni paasiniaasimavoq paasillugulu oktoberip arfineq pingajuat 1968-imi aalajagiisoqarsimasoq.

- Ukiorpassuit eqqarsartoqareerluni aalajangertoqarpoq - illoqarfik matunagu, aalajangertoqarporli sinerissami illoqarfinni assigiinngitsuni Qullisaniit nuuttut inissaannik sanaartortitsiniarluni. Taamaattumik toqqaannanngikkaluamik tassani aalajangertoqarpoq. Tamanut ammasumik uppernarsaatissamik nassaarsinnaasimanngilanga allanneqartumik: Tassa illoqarfik matulerparput.

Søren Peder Sørensen-ip Qullissarmiuusimasorpassuit apersorsimavai, illoqarfinnut allanut nuunnerminni akulerunniarnermik ajornartorsiorsimasunik.

- Qullissat tamanik eqquipput. Nuutsinneqartut misigissutsikkut aalajangiisumik eqqorneqarput, inuunerminni tunngavii nusunneqarmata. Inuiaqatigiit eqqorneqarput, illoqarfinni nuuffigineqartuni paasisimaneqanngimmat sooq qullissarmiut tikerarnersut. Tamanut ammasumik paasisitsisoqarsimanngilaq sooq Qullissat matusaanersut, isumaqartoqartarporlu nuuttut suliffissaminnik inigisaminnillu arsaariartoraatsik, taamaalilluni qinngasaarineq sakkortooq aallartinneqarpoq.

Qullissat matuneqarneranni kukkussut annertooq tassaasimavoq inuiaqatigiit akuutinneqannginnerujussuat, Søren Peder Sørensen oqarpoq. Isumaa malillugu kukkuneq ilinniarfiusinnaasorujussuaq.

- Kalaallit Nunaanniinnaanngitsoq, aammali nunarsuamioqatigiileraluttuinnarnermi nunaqarfinnik avinngarusimasunillu matooraanermi inunnillu katersortitsiverujussuarnik sanaartornerni. Apeqqutit pingaartupilussuit pilersippai, qanoq ililluta sorlaqarfigut pigiinnarsinnaavagut. Inuimmi kinaassusaannut inuunerannullu pingaartupilussuuvoq, aallaavik ilisimassallugu uterfissaqarsinnaallunilu.