Illoqarfiit qorsooqqissut

Naalagaaffiit Peqatigiit Avatangiisimut ulloritaa, illoqarfik qorsooqqissumik qulequtsigaq, nunatsinni aamma immikkut malunnartinneqassaaq, malunnartitsinissami nunaqarfinni avatangiisit sammineqarnerussallutik. Nunaqarfiit minguitsuutinneqarnissaannik ukioq manna immikkut sammisaqarneq, avatangiisinik pinngortitamillu illersuiniaqatigiiffiup Uppiup siulittaasuata Jens Peter Langep ima nassuiaateqarfigaa:

- Nunarfiit 60-it minguitsuutitsiniarnermi peqataajuaannarnissaat anguniarlugu Uppik aaqqissuussiniarpoq. Qulequttat pingasuupput, tassalu nuna ima, inullu. Paasissutissat atuagassiannguanut pingasunut avillugit nassiunneqassapput.

Igitassat naliginnaasut avatangiisinullu navianartut sumut pisarneri paasititsiniutigineqassapput.

Nunaqarfiit minguitsuutitsiniarnernikkut katataasimasinnaanerat iliuuseqarnermut tunngaviunersoq aperineqarami Jens Peter Lange akivoq:

- Naamik nunaqarfimmiulli pinngortitamut qanittuararsuummata paarsilluarnissaat pillugu iliuuseqarpugut. Nunatsinni atuineq ukiuni kingullerni annertusiartuinnartillugu eqqagassat aamma ikaliartornerat malunnarpoq.

Illoqarfik qorsooqqissoq ukioq manna kujataaniit aallartittumik oqariartuutigineqarsimasoq Jens Peter

Lange oqarpoq.

-Nukissiuutitigut sanaartornermi, inissiat aaqqissuunneqarneranni, angallannermi atorluaanissarlu eqqarsaatigalugit iliuuseqarneq ingerlanneqarpoq.

Nunaqarfiit minguitsuutinneqarnissaannut suliummi illersuiniaqatigiiffik Uppik kiisalu Avatangiisinut Peqqinnissamullu pisortaqarfiit suleqatigiissaapput. Suliniullu aallartippat nunaqarfiit puussiarsuarnik eqqaanermi atugassani aamma nassinneqarumaartut Jens Peter Lange oqarpoq.