Nuummi inuit qulinit amerlanerusut katersuunnissaat inerteqqutaasimagaluarpoq, tamanna maanna aamma allanngortinneqarpoq. Illoqarfiit pingaarnersaanni - nunatta sinneraniittut assigalugit inuit amerlanerpaamik 100-sinnaapput.Assi: KNR

Illoqarfiit nunaqarfiillu tamarmik akornanni arfininngornermiit angalasoqarsinnaalissasoq

Nunanulli allanut angalanerit maanna juunip aallaqqaataanuugallaq utaqqissapput.

Nunatsinni tuniluuttoqannginnera naatsorsuutigineqarsinnaanngorpoq, nakorsaaneq oqarpoq.

Nunatsinni coronamik kingullermik tunillatsittoqarneranit ullut 18-it qaangiutereerput. Taamaammat nunatta iluani angallanneq arfininngornermi arfineq-pingasunit ammaqqinneqassaaq.

Timmisartorsuarli Danmarkimut angalasartoq suli uninngatinneqassaaq. Timmisartorsuaq siusinnerpaamik juunip aallaqqaataani aatsaat ingerlaqqilissasoq, angallannermut naalakkersuisoq, Karl Frederik Danielsen (S) tusagassiortunik katersortitsinermi oqarpoq.

Air Greenland Disko Linelu aqqutigalugit nunatta iluani angalanissamut aqagumit inniminniisoqarsinnaalissaaq

Neriniartarfiit nujaleriffiillu aamma ammaqqissasut

Nujaleriffiit inuussutissarsiortullu namminersortut arfininngorpat ullaakkut arfineq-pingasunut ammaqqissapput.

Inuilli isersimasinnaasut qatserisartut nalinginnaasumik innersuussutigisartagaannit affaannaatinneqassapput. 

Neriniartarfiit cafét aamma ammaqqissinnaapput. Matumani killilersuinerit aamma assigaat: Neriniartarfimmi inuit 50-it inissaqartinneqarpata arfininngorpat ammarunik 25-nik isersimasoqarsinnaassapput.

Issiaviit nerriviillu akornanni inissaqarnerussaaq inuillu imminnut 2 meterimik ungasitsigisassallutik.

Tamanna imerniartarfinnut aamma atuuppoq. Aamma timersortarfiit, timigissartarfiillu aamma ammaqqissapput, inoqarsinnaassusaasalu affaannaanit atorneqarsinnaassallutik.

Nunatsinni tuniluuttoqanngitsoq

Nuummi inuit qulinit amerlanerusut katersuunnissaat inerteqqutaasimagaluarpoq, tamanna maanna aamma allanngortinneqarpoq. Illoqarfiit pingaarnersaanni - nunatta sinneraniittut assigalugit inuit amerlanerpaamik 100-sinnaapput.

Taamaalilluni killilersuinerit illoqarfiit pingaarsaanni atuuttut nunatta sinneraniittut assigilerlugit.

Tamakkulu tamarmik nunatsinni tunillatsissimasoqannginneranik pissuteqartut, nakorsaaneq, Henrik L. Hansen oqarpoq.

- Malittarisassat pingaartumik Nuummut atuuttut atorunnaarsinneqarput, pissutigalugu Nuummi tuniluuttoqanngissorigatsigu. Taamaammat Nuuk nunatta sinneranut naligiissilerneqarpoq, nakorsaaneq oqarpoq.

 

Isummersuutit