Illoqarfiit innarluutilinnut atoruminarsarnissaat akisusariaqanngilaq
- Tummeqqat alloriaat ikittunnguakkaarlugit kaassuartakkanut aqquseraanni nunallu sivinganeri atorluartaraanni, taava aningaasaliissutit ilavallaarnagit, inissiat uiguleriiaat inissiarsuillu quleriiaat angujuminarsisinneqarsinnaasut, Søren Ginnerup oqarpoq. Innarluutillit illoqarfimmi nammineerlutik angalasinnaalersinnissaat pillugu pingasunngormat naapeqatigiittoqarmat, taanna saqqummiivoq.
Illut inunnit orninneqartartut nutaat tamarmik, taakkua sanaqqinneri allilerneriluunniit pitsorluttunut kaassuartakkanik issiavilinnut innarluutilinnullu allanut ornikkuminartuussasoq, Sanaartornermik maleruagassami 2007 januaarip aallaqqaataanili piumasarineqarpoq.
Kisianni taamaakkaluartoq illuliat akisunerujussuusariaqangillat.
Siullermik sanaartornerup aallartineraniilli tummerartaqanngitsumik illumut apuussinnaanissaq sanasut isumagisinnaavaat. Aningaasartuutit ilaqqinngikkaluarlugit, Sisimiuni illuliat pingasuugaangata marluk taamaaliorneqarsimasinnaagaluarput.
Nunap assigiinngiiaartumik portussuseqarnera aamma arlalinni atorluarneqarsinnaasoq, oqaluttuarpoq:
- Assersuutigalugu isaarissap silataa manissarneqarsimappat, taavalu biilinut unittarfiup tungaanut annikitsumik sivingappat, aqqutaani itersat ujaqqanik immerneqaannassapput. Tassalu akitsorsaataasartumik kaassuartakkanut aqqusiortariaqassanani. Taamannak iluarsiisarneq nunarsuarmi tamarmi atugaaleraluttuinarpoq. Akisunngilaq annerusumillu aserfallatsaalisariaqarani.
Ataatsimut isigalugu Sisimiuni innarluutilinnut ornitaminnut apuunnissamut periarfissarissaarnerat, immikkut ilisimasallip tupigusuutigaa.
- Takuinnarlugit eqqoriaassaguma oqarsinnaavunga, Sisimiuni illut tummeqqakkooqqaarani iserfigineqarsinnaasut, Danmarkimi illoqarfinnik agguaqatigiissitsinermut naapertuuttuusoq. Taamatut ilimasussimanngikkaluarpunga.
Innarluutillit illoqarfimmi nammineerlutik angalasinnaalersinnissaat pillugu pingasunngormat naapeqatigiinneq Qeqqata Kommunianit aamma Ineqarnermut Naalakkersuisoqarfimmit aaqqissuunneqarpoq.
