Illoqarfiit aqqi kalaallisut danskisulluunniit?

Sukkertoppen imaluunnit Maniitsoq, Jakobshavn imaluunnit Ilulissat. Apeqqutit taama ittut statsministerip Anders Fogh Rasmussenip isummerfigisussanngorpai, Dansk Folkeparti-meersup Søren Espersenip kissaatigisimammagu, Danmarkimi naalakkersuisut qitiusumillu aqutsisoqarfiup Kalaallit Nunaanni nunat aqqi pineqartillugit danskisut kalaallisullu taaneqartalernissaat.

Folketingip Grønlandsudvalgiata Nunatsinnut sapaatip-akunneri marlussuit matuma siornatigut angalanerani Søren Espersen peqataavoq, nunallu aqqisa kalaallisut atorneqartalersimanerat - aamma Danmarkimi qitiusumik aqutsisoqarfimmi iluarisimagunarnagu.

Søren Espersenip paasisinnaanerarpaa, Kalaallit Nunaata nammineerneruleriartornini ilutigalugu nunat aqqisa kalaallisut erseqqissumik taaguuteqartilernissaat pisariaqartissimassappagu. Oqaluttuarisaanerli kulturilu pissutigalugit isumaqarpoq, Kalaallit Nunaanni nunat aqqi kalaallisut danskisullu taaguuteqartinneqarnerat attatiinnarneqassasoq.

Statsministeri Anders Fogh Rasmussen tamanna pillugu suli akissuteqanngilaq.