Illissap paavatigut kræftimut akiuussutissamik periarfissaq atulerli
Illissap paavatigut kræftip pinaveersaartineqarnissaanut Kalaallit nunaani akiuussutissamik periarfissiisalernissaq inatsisartuni ilaasortap Asii Chemnitz Narup siunnersuutigaa.
Allattoq Jaaku Lyberth
septembarip 30-at 2007 13:30
Illissap paavatigut kræftip pinaveersaartinneqarnissaanut akiuussutissat assigiingitsut marluk ineriartortinneqarsimapput, taakkualu Danmarkimi sundhedsstyrelsip pitsaalluinnartutut sunniuteqarluartutullu nalilerpai, inatsisartuni ilaasortaq Asii Chemnitz Narup IA, tusagassiuutinut nalunaaruteqarnermini allappoq. Qaammatip uumap aallartisimalernerani issittumi peqqissuseq pillugu ilisimatusartut Nuummi ataatsimeersuarneranni , kræftimik immikkut ilisimasallip kaammattutigivaa, Kalallit nunaanni kræftimut akiuussutissamik atuilersitsisoqartariaqartoq. Akiuussutissat nutaat akeqanngitsumik piaarnerpamillu neqeroorutigineqartalernissaat ingammik arnanut inuusuttunut, Asii Chemnitz Narup-ip siunnersuummini tunngavilersuutigai.
