Illissap paavatigut kræfteqalersarneq inatsisartuni oqaluuserineqassaaq

Illissap paavatigut kræfteqalernissamut ulorianartorsiorsinnaaneq pinaveersaartinniarlugu inatsisartuni peqqissutsimut ataatsimiititaliap illissap paavatigut kræftimik akiuussutissamik akeqanngitsumik kapitissinnaanermut piviusunngortitsiniarlutik inassuteqarput. Tassanilu pingajussaaneerneqassalluni aningaasanut inatsisip naggataarneqarnerani.

Pineqarpoq inuusuttuaqqat 12-niit 16-inut ukiullit illissap paavatigut kræfteqalernissamut akiuussutissamik kapitittarnissaannit peqqissutsimut ataatsimiitaliap anguniagaa.

Tassanilu aningaasat 11.5 mio. koruunit immikkoortinneqarnissaanik peqqissutsimut ataatsimiititaliaq inassuteqarpoq.

Dronning Ingrid-ip napparsimaviani arnat nappaataanut nakorsaaneq Peder Kern inatsisartut aalajangiussiffigineqartussaq neriuutigaa akuerineqassasoq.

- Isumaqarpunga nutaarsiassaq nuannersuusoq, taamaaliornikkut ukiumut arnat sisamat toqunissaagaluat pinngitsoortinneqarsinnaammat. Maluginiarsimavarput, illissap paavatigut kræfteqalernissamut nappaammik eqqugaakkajunnerusut anaanasut inuusuttut. Soorunalimi aamma arnat ukioqqortunerit eqqugaasarput.

Kisianni tassa nuannaarutigaarput nappaammut akiuussutissamik inuusuttuaqqat Namminersornerullutik Oqartussat akiligaanik akiuussutissamik kapitissinnaangussappata. Taamatullu arnat toqqissisimananngitsumik nappaammik misissortittarnerat annikillisinneqarsinnaammat.

Nappaammullu akiuussutissaq akeqanngitsumik pineqarsinnaalissappat arnat illissap paavatigut kræfteqalersartut ikilisinneqarsinnaaput, taama oqarpoq Peder Kern Dronning Inngerip napparsimavissuani arnat nappaataanut nakorsaaneq.

Kalaallit Nunaanni ukiumut arnat 2500-it missaat illissap paavatigut misissortittarput. Taakkunanngalu arnat 20-it missaat ukiumut suliaritittarlutik.