Illissamik peerneqarnissaat pisariaqartinnerusarpaat

Tuluit Nunaanni, Oxfordip universitetiani ilisimatuut erninerit 775.000-it misissugarereerlugit taama inerniliipput.

Taamammat immikkut ilisimasallit arnat pilatsillutik ernerusuttut nangaasaarpaat.

Arnat 1.300-t pilatsillutik ernigaangata ataatsip illiani peersittariaqartarpaa, marloriarlutillu pilatsillutik ernisimasut 220-iinnaat akornanni ataatsip illissani peersittariaqartarlugu. Tamatumunnga pissutaavoq illiaq qilerunissimatillugu arlaap iloqisserluni mamikkiartortarnera, tamannalu unitsikkuminaatsumik aannermik kinguneqarsinnaavoq, Hillerødimi ernisarfimmi nakorsaaneq Kim Toftager Larsen oqarpoq, nangillunilu:

- Ukiumut arnat qulit illiaat peertariaqartarpavut, illiaartinnerlu annikitsumik pilatsinnertutut isigineqassanngilaq arnamullu ulorianarsinnaalluni.

Pilatsilluni erninerup kinguneranik aseruuttoortoqalersinnaavoq pilatseqqinnissamik kinguneqarsinnaasumik, tassalu illissap aamma peertariaqarneranik kinguneqarsinnaavoq, taamaalillunilu arnaq naartoqqissinnaajunnaassalluni.

Naartusorli, arnap meeqqalluunniit peqqinnissaa eqqarsaatigalugu pilatsilluni erninissaminut nakorsamit kaammattorneqaruni nangaariartariaqanngilaq, Kim Toftager Larsen oqarpoq. Pisariaqanngikkaluamilli pilatsillutik erniniartut mianersoqquneqartariaqarput, arnamut meeqqamullu ulorianarsinnaammat.

Nuummi Dronning Ingridip napparsimaviani ernisussiortut ningiuat oqarpoq Kalaallit Nunaanni ernisartut 1000-it qulit 15-illu procentiisa missaat pilatsillutik ernisartut. Danmarkimi pisariaqavinngitsumik pilatsillutik ernisartut ikinnerujussuupput.

Siornatigut paasineqarnikuuvoq pilatsinnikkut erniusimasut anersaartorniarnermikkut akornuteqarnerulersartut.